2019 წლის 13-14 აპრილს ცესკოს სწავლების ცენტრმა განახორციელა მოსამზადებელი სასწავლო კურსი საარჩევნო ადმინისტრაციის ტრენერებისთვის, რომლებიც, 2019 წლის 19 მაისის საქართველოს პარლამენტის შუალედური, მუნიციპალიტეტების საკრებულოების შუალედური და მუნიციპალიტეტების მერების რიგგარეშე არჩევნებისთვის საარჩევნო ადმინისტრაციის მოხელეთა კვალიფიკაციის ამაღლების ხელშეწყობის მიზნით, უზრუნველყოფენ საარჩევნო კანონმდებლობასთან დაკავშირებული ინტენსიური სასწავლო პროგრამების განხორციელებას საოლქო და საუბნო საარჩევნო კომისიების წევრებისთვის. 

მონაწილეები სწავლების ცენტრის მიერ შემუშავებული სასწავლო კურსის ფარგლებში გაეცნენ სხვადასხვა მნიშვნელოვან საკითხს, მათ შორის:

• ტრენინგების ადმინისტრირება - ტრენინგების სისტემა და ეტაპები, ტრენინგების მეთოდოლოგია, სასწავლო მასალები;
• საოლქო საარჩევნო კომისიის კომპეტენციას მიკუთვნებული საკითხები;
• საოლქო და საუბნო საარჩევნო კომისიებს შორის კომუნიკაცია/კოორდინაცია;
• საუბნო საარჩევნო კომისიის კომპეტენციას მიკუთვნებული საკითხები;
• კენჭისყრის დღე და საარჩევნო ოპერაციების მართვა;
• ხმის მიცემის პროცესში ამომრჩეველების საარჩევნო უფლებების რეალიზების ხელშეწყობის პროცედურული მექანიზმები, მათ შორის, შეზღუდული შესაძლებლობების მქონე ამომრჩევლებთან საუბრის ეტიკეტი და ქცევის ნორმები;
• ამომრჩეველთა პერსონალური მონაცემების დაცვა;
• კენჭისყრისა და არჩევნების შედეგების შეჯამება;
• არჩევნების სანდოობა და უსაფრთხოება;
• კენჭისყრის დღის განცხადება/საჩივრები.

ტრენერთა ტრენინგი 25 მონაწილემ გაიარა. საოლქო და საუბნო საარჩევნო კომისიების წევრთათვის ტრენინგების ჩატარების დეტალური გრაფიკები გასაჯაროვდება სწავლების ცენტრის და ცესკოს ვებ-გვერდებზე.