ცენტრალურ საარჩევნო კომისიაში (ცესკო) შეზღუდული შესაძლებლობის მქონე პირთა საკითხებზე მომუშავე მუდმივმოქმედი ჯგუფის წევრებთან შეხვედრა გაიმართა. შეხვედრა ცესკოს თავმჯდომარე თამარ ჟვანიამ გახსნა და 2018 წლის 28 ოქტომბრის საქართველოს პრეზიდენტის არჩევნებისთვის ინკლუზიური საარჩევნო გარემოს უზრუნველყოფის მიზნით ცესკოს მიერ განხორციელებული საქმიანობის შესახებ ისაუბრა. თამარ ჟვანიამ შეხვედრის მონაწილეებს ადაპტირებული საარჩევნო უბნების მონიტორინგის საკითხის შესახებ, ასევე კენჭისყრის დღეს საარჩევნო უბნებზე შშმ პირებისთვის საარჩევნო უფლების რეალიზების ხელშეწყობის თვალსაზრისით შეთავაზებულ სერვისებთან დაკავშირებით მიაწოდა ინფორმაცია. სწავლების ცენტრის დირექტორმა, ნათია ზაალიშვილმა სამუშაო ჯგუფის წევრებს განხორციელებული საგანმანათლებლო პროექტებისა და საგრანტო კონკურსების შესახებ მიაწოდა ინფორმაცია.

სამუშაო ჯგუფის ხელმძღვანელმა, ცესკოს კოორდინაციის, დაგეგმვისა და ანგარიშგების დეპარტამენტის უფროსმა სოფიო სიჭინავამ, 2018 წლის სამოქმედო გეგმის მიხედვით, შშმ პირთა თანაბარი საარჩევნო გარემოს ხელშეწყობის მიმართულებით გათვალისწინებული საქმიანობის შესახებ იმსჯელა და აღნიშნა, რომ სამოქმედო გეგმით გათვალისწინებული სამი ძირითადი მიმართულება - შშმ პირთა ინფორმირება, ადმინისტრაციის თანამშრომელთა კვალიფიკაციის ამაღლება და საარჩევნო უბნების აღჭურვის პროცესში შშმ პირთა საჭიროებების მაქსიმალურად გათვალისწინება, უკვე შესრულებულია. ჯგუფის წევრებმა დღესვე საკუთარი რეკომენდაციებიც წარმოადგინეს.

აღსანიშნავია, რომ ინკლუზიური საარჩევნო გარემოს გაუმჯობესების მიზნით, მსგავსი ტიპის შეხვედრები საარჩევნო ადმინისტრაციის ინიციატივით, მუდმივად იმართება.