მიმდინარე წლის 25 ივნისს, 15  საათზე, სასტუმრო ”ქორთიარდ მარიოტში” გაიმართა შეხვედრა, რომლის ფარგლებშიც თბილისის ღია სასწავლო უნივერსიტეტი, კავკასიის საერთაშორისო უნივერსიტეტი და საქართველოს უნივერსიტეტი შეუერთდნენ  2010 წლის 28 სექტემბერს ცენტრალური საარჩევნო კომისიას, საარჩევნო სისტემების განვითარების, რეფორმებისა და სწავლების ცენტრსა და საქართველოში აკრედიტებულ უმაღლეს საგანმანათლებლო დაწესებულებებს შორის გაფორმებულ ურთიერთთანამშრომლობის მემორანდუმს.

ურთიერთთანამშრომლობის მემორანდუმი ითვალისწინებს პარტნიორ უნივერსტეტებში ჟურნალისტიკის, იურიდიული და სოციალურ მეცნიერებათა ფაკულტეტებზე საარჩევნო სამართლის კურსის დანერგვას, სტუდენტების  სამოქალაქო ცნობიერების ამაღლებასა და პრაქტიკული უნარ-ჩვევების განვითარებას. 

შეხვედრას ესწრებოდნენ ცენტრალური საარჩევნო კომისიისა და სწავლების ცენტრის წარმომადგენლები, საქართველოში აკრედიტებული უმაღლესი საგანმანათლებლო დაწესებულებების რექტორები, იურიდიული და ჟურნალისტიკის ფაკულტეტის დეკანები და  ადგილობრივი საერთაშორისო ორგანიზაციების წარმომადგენლები.

შეხვედრაზე  პარტნიორი  უმაღლესი საგანმანათლებლო დაწესებულებების რექტორებმა ცესკოს და სწავლების ცენტრის ხელმძღვანელობასთან ერთად 2011-2012 სასწავლო წელს მიმდინარე სწავლების კურსის შედეგები შეაჯამეს. ასევე მოხდა ჟურნალისტიკის ფაკულტეტის იმ სტუდენტების მიერ მომზადებული ვიდეორგოლების ჩვენება, რომლებიც საარჩევნო კურსში იყვნენ ჩართულები. ხოლო სწავლების ცენტრთან არსებული იურიდიული კლინიკის სტუდენტებს კურსის წარმატებით დასრულების სერტიფიკატები ცესკოს თავმჯდომარემ ბატონმა ზურაბ ხარატიშვილმა  და სწავლების ცენტრის დირექტორმა ქალბატონმა ნათია ზაალიშვილმა გადასცეს.