ცესკოს და სწავლების ცენტრის ხელმძღვანელი პირები დემოკრატიისა და არჩევნების ხელშეწყობის საერთაშორისო ინსტიტუტის მიერ (IDEA) ორგანიზებული სასწავლო ვიზიტის ფარგლებში მოლდოვასა და მონღოლეთის დელეგაციებს შეხვდნენ. მოლდოვას რესპუბლიკის დელეგაციას, ცენტრალური საარჩევნო კომისიის თავმჯდომარე ალინა რუსუ ხელმძღვანელობდა.
მოლდოვას საარჩევნო ადმინისტრაციისა და აუდიტის სამსახურის, ასევე მონღოლეთის აუდიტის სამსახურის წარმომადგენლებს საქართველოს საარჩევნო ადმინისტრაციამ პოლიტიკური პარტიების დაფინანსების საკითხზე გამოცდილება გაუზიარა. ცესკოს თავმჯდომარემ თამარ ჟვანიამ შეხვედრის მონაწილეებს პარტიების დაფინანსებაში ცესკოს როლის შესახებ მიაწოდა ინფორმაცია და გააცნო საკანონმდებლო ჩარჩო. ცესკოს მანდატის ფარგლებში პარტიების დაფინანსების საკითხზე პრეზენტაცია წარადგინა ცესკოს საფინანსო დეპარტამენტის უფროსმა ოთარ ბუსკივაძემ. სწავლების ცენტრის ხელმძღვანელმა ნათია ზაალიშვილმა კი მონაწილეებს გააცნო სწავლების ცენტრის საქმიანობა პარტიების განვითარებისა და მათი დაფინანსების მიმართულებით.
სასწავლო ვიზიტის ფარგლებში შეხვედრები ასევე გაიმართა საქართველოს სახელმწიფო აუდიტის სამსახურის და არასამთავრობო სექტორის წარმომადგენლებთან.
