2018 წლის 28 აპრილს №54 მაჟორიტარულ საარჩევნო ოლქში გასამართი საქართველოს პარლამენტის შუალედური არჩევნებისთვის შემუშავებული საარჩევნო ადმინისტრაციის ტრენინგების კონცეფციის შესაბამისად, 18 და 19 აპრილს განხორციელდა საოლქო საარჩევნო კომისიების წევრთა ტრენინგების II ეტაპი, რომელიც დაეთმო საოლქო საარჩევნო კომისიების სრული შემადგენლობის სწავლებას და განხილულ იქნა შემდეგი სასწავლო მოდულები:

• საარჩევნო უბნის გახსნა და კენჭისყრამდე ჩასატარებელი პროცედურები;
• კენჭისყრის პროცესი (მათ შორის, შშმ ამომრჩევლების საარჩევნო პროცესში ჩართულობის ხელშეწყობის პოლიტიკა);
• საარჩევნო უბნის დახურვა, კენჭისყრის შედეგების შეჯამება;
• საარჩევნო დოკუმენტაციის გადაცემა საოლქო საარჩევნო კომისიისთვის;
• არჩევნების უსაფრთხოება.

საუბნო საარჩევნო კომისიების წევრებისათვის განკუთვნილი სასწავლო პროგრამის ფარგლებში საოლქო საარჩევნო კომისიების წევრთა უშუალო ჩართულობით კენჭისყრის დღის ეპიზოდური ინსცენირების ჩატარების უზრუნველსაყოფად, სწავლების ცენტრის წარმომადგენლებმა საოლქო საარჩევნო კომისიების წევრებს ასევე მიაწოდეს შესაბამისი საინფორმაციო ხასიათის ინსტრუქტაჟი (ეპიზოდური ინსცენირება ითვალისწინებს კენჭისყრის დღის დილის 07:00 საათიდან - 08:00 საათამდე ჩასატარებელი პროცედურებისა და კენჭისყრის შედეგების შემაჯამებელი ოქმის შედგენის პრაქტიკული სავარჯიშოს შესრულებას).

ტრენინგი გაიარა N53 ვანისა და N55 ხონის საოლქო საარჩევნო კომისიის 22 წევრმა, მათ შორის კაცი - 8, ქალი - 14. დეტალური სტატისტიკა იხილეთ ბმულზე.