საარჩევნო ადმინისტრაციამ 2017 წლის საქმიანობის შესახებ პრეზენტაცია წარადგინა. გასულ წელს ინსტიტუციური გაძლიერების, სამოქალაქო და ამომრჩევლის განათლების, საარჩევნო გარემოს გაუმჯობესების, საარჩევნო ოპერაციების კუთხით განხორციელებულ აქტივობებზე ინფორმაცია წარადგინეს ცესკოს თავმჯდომარე თამარ ჟვანიამ, თავმჯდომარის მოადგილე გიორგი შარაბიძემ, ცესკოს მდივანმა გიორგი ჯავახიშვილმა, ცესკოს სწავლების ცენტრის ხელმძღვანელმა ნათია ზაალიშვილმა და კომისიის პრეს-სპიკერმა ანა მიქელაძემ. თამარ ჟვანიამ ასევე ისაუბრა არსებული გამოწვევებისა და სამომავლო გეგმების შესახებ.
პოლიტიკური პარტიების, ადგილობრივი და საერთაშორისო ორგანიზაციების, საქართველოში აკრედიტებული დიპლომატიური მისიების, სახელმწიფო უწყებებისა და მედიის წარმომადგენლებმა შეხვედრაზე მოისმინეს თუ როგორ ჩაატარა საარჩევნო ადმინისტრაციამ საორგანიზაციო თვალსაზრისით ყველაზე რთულად ადმინისტრირებადი, მუნიციპალიტეტის წარმომადგენლობითი ორგანოს – საკრებულოსა და თვითმმართველი ქალაქის/თვითმმართველი თემის მერის არჩევნები, თუ რა ინოვაციური სერვისები და პროექტები განხორციელდა იმისათვის, რომ ამომრჩეველს ჰქონოდა შესაძლებლობა ხარვეზების გარეშე, თავისუფალ გარემოში მიეღო საარჩევნო პროცესში მონაწილეობა.
შეხვედრაზე განიხილეს საარჩევნო ადმინისტრაციის მიერ გადადგმული ნაბიჯები ეფექტური მართვის და ინკლუზიური საარჩევნო გარემოს უზრუნველყოფის კუთხით, განხორციელებული სამოქალაქო და ამომრჩეველთა საგანმანათლებლო პროგრამები, ელექტრონული რეგისტრაციების სპეციალური პროგრამა, სამოქალაქო საზოგადოების ჩართულობის ხელშეწყობა, საარჩევნო პროცესში ჩართულ მხარეებთან თანამშრომლობა, საარჩევნო ადმინისტრაციის წევრთა კვალიფიკაციის ამაღლების პროგრამები და სხვა მნიშვნელოვანი საკითხები.
