5-11 მაისს საქართველოს ცენტრალური საარჩევნო კომისიის თავმჯდომარე ზურაბ ხარატიშვილი, ცესკოს წევრი დავით გურგენიძე, იურიდიული დეპარტამენტის უფროსი არჩილ ანასაშვილი, საზოგადოებასთან ურთიერთობის დეპარტამენტის უფროსი ქეთევან დანგაძე და საარჩევნო სისტემების განვითარების, რეფორმებისა და სწავლების ცენტრის დირექტორი ნათია ზაალიშვილი ოფიციალური ვიზიტით საფრანგეთში იმყოფებოდნენ.
ვიზიტის მიზანს საარჩევნო კუთხით გამოცდილების გაზიარებასთან ერთად, ცენტრალური საარჩევნო კომისიის და საარჩევნო სისტემების განვითარების, რეფორმებისა და სწავლების ცენტრის მიერ საუბნო საარჩევნო კომისიებისთვის დამზადებული სახელმძღვანელო ინსტრუქციების, ასევე მედიისთვის და დამკვირვებლებისთვის შემუშავებული დამხმარე სახელმძღვანელოების განხილვა იყო.
ვიზიტის ფარგლებში შედგა შეხვედრა, სადაც ზემოთ აღნიშნული დოკუმენტაცია ცესკოს დელეგაციასთან ერთად ევროპის საბჭოს პროგრამების მენეჯერმა იგორ გაონმა, საარჩევნო ექსპერტმა ხორვატიიდან მორანა სუსეკმა და ექსპერტმა შვეიცარიიდან პატრიკ თრიზმა განიხილეს. მხარეებმა წარმოადგინეს საკუთარი მოსაზრებები და რეკომენდაციები და ცესკოსა და სწავლების ცენტრის მიერ შემუშავებულ დოკუმენტაციას დადებითი შეფასება მისცეს.
კომისიის წარმომადგენლები ქვეყანაში მიმდინარე საპრეზიდენტო არჩევნების მეორე ტურის მიმდინარეობისას საარჩევნო პროცესს რამდენიმე საარჩევნო უბანზე დაესწრნენ და საფრანგეთის საარჩევნო სისტემასაც გაეცნენ.
