საარჩევნო ადმინისტრაციის ინსტიტუციური გაძლირების ხელშეწყობის მიზნით, 19 თებერვლიდან 8 მარტის ჩათვლით პერიოდში, სწავლების ცენტრი საოლქო საარჩევნო კომისიების წევრებისთვის განახორციელებს ახალ სასწავლო პროგრამას „ტრენერის პროფესიული უნარების განვითარება“.

ღონისძიება ცესკოს თავმჯდომარემ თამარ ჟვანიამ და სწავლების ცენტრის დირექტორმა ნათია ზაალიშვილმა გახსნეს, რომლებმაც ისაუბრეს აღნიშნული პროექტის მნიშვნელობაზე, რაც მიზნად ისახავს საარჩევნო ადმინისტრაციის მანდატის ფარგლებში სამოქალაქო საარჩევნო სასწავლო პროექტების ეფექტიანად განხორციელების უზრუნველსაყოფად საოლქო საარჩევნო კომისიების წევრთა გადამზადებას და კვალიფიციურ ტრენერთა საკადრო  რესურსის ფორმირებას. მონაწილეებს ასევე  ცესკოს თავმჯდომარის მოადგილე გიორგი შარაბიძე და ცესკოს მდივანი გიორგი ჯავახიშვილი მიესალმნენ.

ტრენინგი პრაქტიკულ სწავლებაზეა ორიენტირებული, რომლის ფარგლებშიც მონაწილეები განიხილავენ შემდეგ ძირითად საკითხებს:

• ტრენინგის დაგეგმვა და სტრუქტურა;
• ტრენინგის პროგრამის დიზაინი;
• ტრენინგის ჩატარების მეთოდოლოგია;
• ტრენინგის შეჯამება/შეფასების მექანიზმები;
• ტრენერის სახელმძღვანელოს/გზამკვლევის შედგენისა და გამოყენების ტექნიკა;
• ტრენერის პროფესიული და ზოგადი უნარ-ჩვევები;
• პრეზენტაციის უნარ-ჩვევები.

ტრენინგები 3 ეტაპად 6 ჯგუფს ჩაუტარდება, რომლის შემადგენლობაში შედიან საოლქო საარჩევნო კომისიების წევრები და ცესკოს რეგიონული კოორდინატორები. სასწავლო პროგრამას საარჩევნო ადმინისტრაციის 100-მდე მოხელე გაივლის, რომლებიც შემდგომ სწავლების ცენტრთან თანამშრომლობით უზრუნველყოფენ 2018 წლისთვის სამოქალაქო საარჩევნო განათლების კუთხით დაგეგმილი სხვადასხვა პროექტის განხორციელებას.