არჩევნების საერთაშორისო დღესთან დაკავშირებით საარჩევნო ადმინისტრაციას სოხუმის სახელმწიფო უნივერსიტეტის სტუდენტები ეწვივნენ. იურიდიული ფაკულტეტის სტუდენტებს ცესკოს თავმჯდომარე თამარ ჟვანია და სწავლების ცენტრის დირექტორი ნათია ზაალიშვილი შეხვდნენ. მათ ახალგაზრდებთან არჩევნების მნიშვნელობაზე ისაუბრეს და ყურადღება გაამახვილეს საარჩევნო პროცესში ამომრჩევლის და დაინტერესებული მხარეების ჩართულობაზე. თამარ ჟვანიამ სტუდენტებთან ასევე განიხილა საარჩევნო ადმინისტრაციის მიერ განხორციელებული საქმიანობები, რომელსაც ცესკო საარჩევნო გარემოს გაუმჯობესების მიზნით ახორციელებს და ისაუბრა საგანმანათლებლო პროექტებზეც, რომლებიც ახალგაზრდა ამომრჩევლებისთვის ხორციელდება.
ღონისძიების ფარგლებში სტუდენტებისთვის, ცესკოს სწავლების ცენტრის წარმომადგენელმა ლაშა მელაძემ ჩაატარა სემინარი თემაზე „ინფორმირებული ახალგაზრდა ამომრჩეველი“.
სტუდენტებთან საინფორმაციო შეხვედრას, ასევე ესწრებოდა სოხუმის სახელმწიფო უნივერსიტეტის იურიდიული ფაკულტეტის დეკანი, პროფესორი ვეფხვია გვარამია, რომელმაც აღნიშნა, რომ ცესკოს, სწავლების ცენტრის და უნივერსიტეტს შორის არსებული თანამშრომლობა, ცალსახად უწყობს ხელს ახალგაზრდების ცნობიერების ამაღლებას საარჩევნო საკითხებზე.
ღონისძიების დასასრულს ახალგაზრდებმა საარჩევნო თემატიკის ისტორიული ფოტოგამოფენა დაათვალიერეს; მათ ასევე მოინახულეს ცესკოს ბიბლიოთეკა.
არჩევნების საერთაშორისო დღე ყოველ წელიწადს, თებერვლის პირველ ხუთშაბათს აღინიშნება.
