ცესკოს და სწავლების ცენტრის წარმომადგენლები მოლდოვას საარჩევნო ადმინისტრაციის 20 წლის იუბილესადმი მიძღვნილ ღონისძიებას დაესწრნენ. მოლდოვას დედაქალაქში გამართულ ღონისძიებაში მონაწილეობა მიიღეს სწავლების ცენტრის დირექტორმა ნათია ზაალიშვილმა და მოადგილემ ნინო ბერულავამ, ცესკოს სახელმწიფო შესყიდვების განყოფილების უფროსმა თეა ხუხიამ და კოორდინაციის, დაგეგმვისა და ანგარიშგების დეპარტამენტის სპეციალისტმა ქეთევან ვარდანაშვილმა.
ვიზიტის ფარგლებში საქართველოს დელეგაციის წარმომადგენლებმა მონაწილობა მიიღეს მრგვალი მაგიდის ფორმატში გამართულ დისკუსიაში თემაზე „არჩევნებში გენდერული თანასწორობისა და ქალთა მონაწილეობის ხელშეწყობის მიზნით საარჩევნო ადმინისტრაციის გამოცდილება და კარგი პრაქტიკა“. სწავლების ცენტრის დირექტორმა ნათია ზაალიშვილმა არჩევნებში გენდერული თანასწორობის საკითხებზე სამოქალაქო განათლების მნიშვნელობაზე მოხსენება გააკეთა და ევროკავშირისა და საარჩევნო სისტემების საერთაშორისო ფონდის (IFES) მოწვეულ ექსპერტებთან ერთად გენდერულ ჭრილში პოლიტიკური პარტიების დაფინანსებისა და კვოტების საკითხებზე ისაუბრა.
ღონისძიებაზე ასევე განხილულ იქნა მოლდოვის საარჩევნო ადმინისტრაციისა და მისი ტრენინგ ცენტრის ინიციატივა, რომელიც უკავშირდება „ქალები საარჩევნო მენეჯმენტში“ ორგანიზაციის ჩამოყალიბებას. აღნიშნულ ორგანიზაციაში ერთიანდებიან სხვადასხვა ქვეყნის საარჩევნო ადმინისტრაციები და მათ შორის საქართველო. ამ მიმართულებით საქართველოს საარჩევნო ადმინისტრაციის მიერ გადადგმულ ნაბიჯებზე დამსწრე საზოგადოებას ინფორმაცია ცესკოს წარმომადგენელმა თეა ხუხიამ მიაწოდა.
ოფიციალური ვიზიტის ფარგლებში საქართველოს ცესკოს და სწავლების ცენტრის წარმომადგენლები მოლდოვას ცენტრალური საარჩევნო კომისიის, მთავრობის, სხვადასხვა საარჩევნო ადმინისტრაციების და საერთაშორისო ორგანიზაციების წარმომადგენლებს შეხვდნენ. შეხვედრაზე არჩევნებთან დაკავშირებული საკითხები განიხილეს.
16-17 ოქტომბერს გამართული ღონისძიებები მოლდოვას საარჩევნო ადმინისტრაციის ტრენინგ ცენტრის და გაეროს განვითარების პროგრამის (UNDP) მხარდაჭერით გაიმართა.
