25 სექტემბერს, ცესკოში გაიმართა სამუშაო შეხვედრა გენდერულ თემებზე მომუშავე საერთაშორისო და ადგილობრივი ორგანიზაციების წარმომადგენლებთან.

შეხვედრა ცესკოს თავმჯდომარემ თამარ ჟვანიამ გახსნა. საარჩევნო ადმინისტრაციის გენდერული თანასწორობის საბჭოს წევრის სტატუსით ღონისძიებას ასევე ესწრებოდა სწავლების ცენტრის დირექტორი ნათია ზაალიშვილი.

მონაწილეებმა მიიღეს ინფორმაცია საარჩევნო ადმინისტრაციის მიერ გენდერული თანასწორობისა და ქალთა გაძლიერების სფეროში დაგეგმილი და განხორციელებული საქმიანობების შესახებ, მათ შორის, 2017 წლის 21 ოქტომბრის არჩევნებისთვის სწავლების ცენტრის მიერ მომზადებული სასწავლო-საინფორმაციო პროექტების თაობაზე.

გენდერული თანასწორობის საბჭოს თავმჯდომარემ, ცესკოს წევრმა, ზურაბ ხრიკაძემ, შეხვედრის მონაწილეეებს სტატისტიკური მონაცემების შესახებაც მიაწოდა ინფორმაცია, მათ შორის გენდერული სტატისტიკა ამომრჩეველთა ერთიან სიაში, საარჩევნო სუბიექტების მიერ წარდგენილ კანდიდატებში, დამკვირვებლებში, აკრედიტებულ მედიაში, საარჩევნო ადმინისტრაციაში დასაქმებულ პირთა შორის.

მონაწილეების განცხადებით, შეხვედრაზე მიღებული ინფორმაცია მათთვის ძალიან მნიშვნელოვანია, მათ დადებითად შეაფასეს გენდერული თანასწორობის ხელშეწყობის მიმართულებით განხორციელებული საქმიანობა და ინტენსიური თანამშრომლობის სურვილიც გამოთქვეს.