სწავლების ცენტრის მიერ 2017 წლის 3 თებერვალს გამოცხადებული საგრანტო კონკურსის ფარგლებში დაფინანსებულმა ცხრამეტმა არასამთავრობო ორგანიზაციამ ქვეყნის მასშტაბით, საქართველოს ყველა რეგიონში განახორციელა სასწავლო პროგრამები პოლიტიკური პარტიებისთვის, რომლის  მიზანი იყო მათი საარჩევნო შესაძლებლობების განვითარების ხელშეწყობა 2017 წელს გასამართი ადგილობრივი თვითმმართველობის წარმომადგენლობითი და აღმასრულებელი ორგანოების არჩევნებისთვის.

არასამთავრობო ორგანიზაციების მიერ შეთავაზებული სასწავლო პროგრამების ფარგლებში მონაწილეები გაეცნენ შემდეგ საკითხებს:

• არჩევნების საერთაშორისო სტანდარტები;
• ადგილობრივი თვითმმართველობის ორგანოთა არჩევნებისთვის მოქმედი საარჩევნო სისტემა საქართველოში;
• ჩართული მხარეების საარჩევნო რეგისტრაცია, მათი უფლება-მოვალეობები საარჩევნო პროცესში და საარჩევნო ეთიკა;
• წინასაარჩევნო კამპანიის/აგიტაციის წარმოება და შეზღუდვები;
• კონფლიქტების მართვა და საარჩევნო დავების გადაწყვეტის საერთაშორისო სტანდარტები;
• კომუნიკაცია, გუნდური მუშაობა და ანგარიშვალდებულება;
• ინკლუზიური არჩევნები (მოწყვლადი ჯგუფების ჩართულობა).

საგრანტო პროექტების განხორციელების პროცესში სწავლების ცენტრმა, კონტრიბუციის სახით, უზრუნველყო პოლიტიკური პარტიების წარმომადგენლების სწავლება შემდეგ მოდულებზე: საარჩევნო ციკლი და საკანონმდებლო სიახლეები; საოლქო და საუბნო საარჩევნო კომისიების საქმიანობა; კენჭისყრის დღის პროცედურები, ასევე სწავლების ცენტრმა უზრუნველყო სასწავლო პროცესის მხარდაჭერა სურდოთარგმანის თანხლებით.  

აღნიშნული საინფორმაციო-საგანმანათლებლო პროგრამა გაიარა პროექტში მონაწილე 42 პოლიტიკური პარტიის (მათ შორის, 20 კვალიფიციური და 22 არაკვალიფიციური პარტიის) 2276 წარმომადგენელმა.