500-მდე ახალგაზრდამ „საარჩევნო განვითარების სკოლის“ ათდღიანი სწავლება ცესკოსა და სწავლების ცენტრის მიერ შემუშავებული სასწავლო პროგრამის მიხედვით გაიარა. საქართველოს 23 მუნიციპალიტეტში, ახალგაზრდები საარჩევნო სისტემების, დემოკრატიული საარჩევნო პრინციპების, საქართველოში არჩევითი ორგანოების, არჩევნებში ჩართული მხარეების, არჩევნების გამჭვირვალობისა და ხელმისაწვდომობის, გენდერული თანასწორობის და ასევე ევროპარლამენტის შესახებ ღებულობდნენ ინფორმაციას. სწავლებას მათთვის საოლქო საარჩევნო კომისიების წევრები და საარჩევნო ადმინისტრაციის ტრენერები უძღვებოდნენ.

28 ივლისს მონაწილეებს სასწავლო კურსის დამადასტურებელი სერთიფიკატები გადაეცათ. ცენტრალური საარჩევნო კომისიის თავმჯდომარე თამარ ჟვანია დღეს ზესტაფონის სკოლაში სწავლების დასკვნით ნაწილს დაესწრო. „სკოლა არჩევნების პოპულარიზაციას და ახალგაზრდების საარჩევნო პროცესებში ჩართულობის გაზრდას ემსახურება. ახალგაზრდების დიდმა ინტერესმა კარგად დაგვანახა, რომ საარჩევნო განვითარების სკოლას უკვე მესამე წელიწადია მოაქვს ძალიან მნიშვნელოვანი შედეგი და ჩვენ მომავალშიც ყველაფერს გავაკეთებთ იმისათვის, რომ თქვენ გქონდეთ ამომწურავი ინფორმაცია საარჩევნო საკითხების შესახებ და კიდევ უფრო მეტი ინტერესი გაგიჩნდეთ არჩევნებისადმი“ - აღნიშნა თამარ ჟვანიამ.

პროექტს ცესკო და სწავლების ცენტრი საარჩევნო სისტემების საერთაშორისო ფონდთან (IFES) თანამშრომლობით და ევროპის საბჭოს (CoE) ფინანსური მხარდაჭერით ახორციელებს.