მოლდოვას პარლამენტის წევრები, საარჩევნო ადმინისტრაციისა და ტრენინგ ცენტრის წარმომადგენლები საქართველოს ცენტრალური საარჩევნო კომისიისა და სწავლების ცენტრის წარმომადგენლებს შეხვდნენ. ცესკოს თავმჯდომარე თამარ ჟვანიამ და სწავლების ცენტრის დირექტორმა ნათია ზაალიშვილმა მათ საარჩევნო ადმინისტრაციისა და სწავლების ცენტრის მუშაობის ძირითადი მიმართულებები, განხორციელებული და მიმდინარე პროექტები გააცნეს.
„მოლდოვას დელეგაციის ვიზიტის მთავარი მიზანი იყო კარგად გაცნობოდნენ საარჩევნო ადმინისტრაციის საქმიანობას იმ საგანმანათლებლო პროგრამების, ტრენინგების, სერტიფიცირების პროცესის ჭრილში, რომელსაც საქართველოს საარჩევნო ადმინისტრაცია ახორციელებს. ეს იყო ძალიან პოზიტიური შეხვედრა. ვფიქრობ, გამოცდილების ურთიერთგაზიარება მნიშვნელოვანია როგორც ჩვენთვის, ასევე ჩვენი მოლდოველი კოლეგებისთვის“, - აღნიშნა თამარ ჟვანიამ შეხვედრის დასრულების შემდეგ.
დელეგაციის ხელმძღვანელის, მოლდოვას საარჩევნო ადმინისტრაციის თავმჯდომარე ალინა რუსუს თქმით, განსაკუთრებით მნიშვნელოვანია საქართველოს ცესკოს სწავლების ცენტრის გამოცდილების გაზიარება.
„ჩვენ განსაკუთრებით გვაინტერესებს საქართველოს საარჩევნო ადმინისტრაციის სწავლების ცენტრის გამოცდილება, თუ როგორ ხდება საგანმანათლებლო ტრენინგების განხორციელება. ჩვენი სასწავლო ცენტრი მოქმედებს 2012 წლიდან და გვაქვს გარკვეული გამოცდილება, მაგრამ ყოველთვის ძალიან საინტერესოა სხვისი გამოცდილების გაზიარება და სწორედ ამიტომ ჩამოვედით საქართველოში“, - განაცხადა ალინა რუსუმ.
მოლდოვას საარჩევნო ადმინისტრაციის წარმომადგენლები ცესკოს იურიდიული დეპარტამენტისა და საარჩევნო პროცესების მართვის დეპარტამენტის ხელმძღვანელებსაც შეხვდნენ და სწავლების ცენტრთან თანამშრომლობით განხორციელებულ ამომრჩეველთა საგანმანათლებლო პროგრამებში საოლქო საარჩევნო კომისიების ჩართულობაზე იმსჯელეს. დელეგაციის წევრებმა შეხვედრები გამართეს საქართველოს პარლამენტშიც.
სასწავლო ვიზიტის ფარგლებში მოლდოვას დელეგაციის წევრები ასევე დაესწრებიან სწავლების ცენტრის მიერ ორგანიზებულ სასწავლო პროგრამას, რომელიც პოლიტიკური პარტიების წარმომადგენლებისთვის ხორციელდება.
დელეგაციის ვიზიტი, საქართველოში 12 ივნისს დაიწყო და 16 ივნისს დასრულდება. სასწავლო ვიზიტი ევროპის საბჭოს ფინანსური მხარდაჭერით ხორციელდება.
