2017 წლის 25 – 26 მაისს ცესკოს თავმჯდომარემ თამარ ჟვანიამ, სწავლების ცენტრის დირექტორმა ნათია ზაალიშვილმა და ცესკოს სარეგისტრაციო და ადმინისტრაციული დეპარტამენტის უფროსმა ელისაბედ ველიძემ შრი - ლანკაში გამართულ მეთოთხმეტე საერთაშორისო საარჩევნო სიმპოზიუმში მიიღეს მონაწილეობა.

საერთაშორისო სიმპოზიუმის ორგანიზატორის - საპარლამენტო სწავლებების საერთაშორისო ცენტრის (ICPS) მიწვევით სწავლების ცენტრის დირექტორი თავმჯდომარეობდა სადისკუსიო პანელს თემაზე „ახალგაზრდების ჩართულობის ხელშეწყობა საარჩევნო პროცესებში“. სადისკუსიო პანელში მონაწილეობა მიიღეს საქართველოს ცესკოს თავმჯდომარემ თამარ ჟვანიამ, ლონდონის ეკონომიკის და პოლიტიკურ მეცნიერებათა სკოლის დოქტორმა სარა ჰარისონმა, ნაურუს რესპუბლიკის საარჩევნო კომისიის წევრმა ჯოზეფ კეინმა და ინდოეთის (რაჯასტანის) საარჩევნო კომისიის წევრმა შრი აშვინი ბაგატმა. მათ სიმპოზიუმის მონაწილეებს გაუზიარეს გამოცდილება საკუთარ ქვეყნებში დანერგილი სხვადასხვა ფორმატის საგანმანათლებლო პროგრამების შესახებ, რომელიც ითვალისწინებს ახალგაზრდა ამომრჩევლების გააქტიურებას და საარჩევნო კულტურის განვითარების ხელშეწყობას.

ღონისძიების ფარგლებში გამართული სესიებისა და დისკუსიების თემები ასევე მოიცავდა შემდეგ საკითხებს: გენდერული თანასწორობა და არჩევნები, საარჩევნო პროცესების ეფექტური მართვა კონფლიქტურ სიტუაციებში, ამომრჩევლებისათვის საარჩევნო გარემოს ხელმისაწვდომობის ზრდა და მათი ჩართულობა პოლიტიკურ პროცესებში, თანამედროვე საარჩევნო ტექნოლოგიები და სხვა.

საერთაშორისო საარჩევნო სიმპოზიუმს, საპარლამენტო სწავლებების საერთაშორისო ცენტრმა (ICPS) შრი-ლანკას საარჩევნო ადმინისტრაციასთან ერთად გაუწია ორგანიზება. ღონისძიებაში 30-ზე მეტი ქვეყნის საარჩევნო ადმინისტრაციების და სხვადასხვა საერთაშორისო ორგანიზაციების წარმომადგენლები, ასევე საერთაშორისო ექსპერტები და საარჩევნო ტექნოლოგიებზე ორიენტირებული კომპანიები მონაწილეობდნენ.