დღეს ცესკომ და სწავლების ცენტრმა 2016 წლის საქმიანობის ანგარიში წარადგინა. შეხვედრა პოლიტიკურ პარტიებთან, ადგილობრივი და საერთაშორისო ორგანიზაციების, სახელმწიფო უწყებებისა და მედიის წარმომადგენლებთან ცესკოს თავმჯდომარე თამარ ჟვანიამ გახსნა.
„მნიშვნელოვანია რომ 2016 წელი საარჩევნო ადმინისტრაციისთვის იყო წარმატებების წელი, ვინაიდან ჩვენ, გარდა საპარლამენტო არჩევნებისა ორი რიგგარეშე და სამი შუალედური არჩევნები ჩავატარეთ. ამავდროულად უამრავი საქმიანობა განვახორციელეთ, როგორც თანამედროვე ტექნოლოგიების სერვისებისა და მომსახურების შეთავაზებით ამომრჩევლებისთვის, ისე არაერთი საგანმანათლებლო პროექტი. თუმცა გამოწვევები რჩება და ეს გამოწვევები მნიშვნელოვანია, ასევე მნიშვნელოვანია როგორც საერთაშორისო ისე ადგილობრივი დამკვირვებლების მიერ გამოთქმული მოსაზრებები და შენიშვნები. ჩვენ ვგეგმავთ ძალიან დიდი აქცენტი გავაკეთოთ სერვისებზე და განათლებაზე“ - განაცხადა ცესკოს თავმჯდომარემ ჟურნალისტებთან საუბრისას.
შეხვედრის მონაწილეებს ასევე მიეწოდათ ინფორმაცია ცესკოსა და სწავლების ცენტრის მიერ 2017 წლისთვის დაგეგმილი ინიციატივების შესახებ, მათ შორის, მოხდა ახალი პროექტის - „ვესაუბრებით ამომრჩეველს“ კონცეფციის გაცნობა. პროექტის ფარგლებში საოლქო საარჩევნო კომისიების წარმომადგენლები ამომრჩევლებთან საჯარო, საინფორმაციო შეხვედრებს გამართავენ, რაც მიზნად ისახავს ამომრჩევლების ცნობიერების ამაღლებას 2017 წლის არჩევნებთან დაკავშირებით, საოლქო საარჩევნო კომისიებსა და მოსახლეობას შორის კომუნიკაციის გაძლიერებას, საარჩევნო ადმინისტრაციის საქმიანობის პოპულარიზაციას და ცნობადობის ზრდას.
ცენტრალური საარჩევნო კომისიის და სწავლების ცენტრის საქმიანობის წლიური ანგარიში - 2016
