საარჩევნო სისტემების განვითარების, რეფორმებისა და სწავლების ცენტრმა, საქართველოს საარჩევნო ადმინისტრაციის 2015-2019 წლების სტრატეგიული გეგმის შესაბამისად, საარჩევნო ადმინისტრაციის თანამშრომელთა უწყვეტი პროფესიული განვითარების მიზნით, მიმდინარე წლის 22 თებერვალს განაახლა საორიენტაციო პროგრამის „არჩევნების მიმოხილვა და პროცედურების ზოგადი სასწავლო კურსი“ განხორციელება საარჩევნო ადმინისტრაციის (ცესკოს აპარატი, საოლქო საარჩევნო კომისიები) ახალი თანამშრომლებისა და სტაჟიორებისათვის.

მონაწილეები სასწავლო კურსის ფარგლებში გაეცნენ ისეთ საკითხებს, როგორიცაა: არჩევნების ისტორია საქართველოში, საარჩევნო ციკლი, საარჩევნო ადმინისტრაცია და ეთიკის კოდექსი, საოლქო და საუბნო საარჩევნო კომისიების საქმიანობა და კენჭისყრის დღის პროცედურები.

ტრენინგში მონაწილეობა მიიღეს ცესკოს სხვადასხვა სტრუქტურული ერთეულის თანამშრომლებმა (ადამიანური რესურსების მართვის სამსახური, შიდა აუდიტის სამსახური, იურიდიული დეპარტამენტი, ინფორმაციული უსაფრთხოების დეპარტამენტი, საინფორმაციო ტექნოლოგიების დეპარტამენტი, საფინანსო დეპარტამენტი). ტრენინგს სულ 17 მონაწილე დაესწრო, მათ შორის 11 კაცი და 6 ქალი.

„არჩევნების მიმოხილვა და პროცედურების ზოგადი სასწავლო კურსი“ განხორციელდება ეტაპობრივად საქართველოს საარჩევნო ადმინისტრაციის 2017 წლის სამოქმედო გეგმის შესაბამისად.