16 ნოემბერს ცესკოში შექმნილმა გენდერული თანასწორობის საკითხებზე მომუშავე საბჭომ არასამთავრობო სექტორთან შეხვედრა გამართა. ცენტრალური საარჩევნო კომისიის თავმჯდომარემ თამარ ჟვანიამ გენდერული თანასწორობის პოლიტიკის შესახებ ისაუბრა და ამ მიმართულებით საარჩევნო ადმინისტრაციის პრიორიტეტებსა და მიზნებზე გაამახვილა ყურადღება. შეხვედრას როგორც სამუშაო ჯგუფის წევრი სწავლების ცენტრის დირექტორიც ესწრებოდა.
მუდმივმოქმედი საბჭოს თავმჯდომარემ, ცესკოს წევრმა, ზურაბ ხრიკაძემ კი დოკუმენტის შინაარსობრივ მხარეზე იმსჯელა და გენდერულ საკითხებზე მომუშავე არასამთავრობო ორგანიზაციების წარმომადგენლების შეკითხვებსაც უპასუხა. დოკუმენტის მიხედვით, საარჩევნო ადმინისტრაციის ერთ-ერთი მთავარი მიზანი არჩევნებში ჩართული მხარეების წარმომადგენელი ქალებისა და კაცებისთვის თანაბარი პირობების შექმნაა, ასევე ქალთა როლის გასაძლიერებლად სპეციალური პროგრამების შემუშავება და ამ პროგრამებში დაინტერესებული მხარეების ჩართვა.
შეხვედრაზე საბჭოს წევრებმა არასამთავრობო სექტორის მოსაზრებებიც მოისმინეს. აღსანიშნავია, რომ საარჩევნო ადმინისტრაციის 2015-2019 წლების სტრატეგიული გეგმის შესაბამისად, გენდერული თანასწორობის ხელშეწყობა ერთ-ერთ უმთავრეს პრიორიტეტს წარმოადგენს.
