2016 წლის 19-21 ოქტომბერს ინდოეთის საარჩევნო კომისიის მიწვევით სწავლების ცენტრის დირექტორი ნათია ზაალიშვილი ინდოეთში ქ. დელიში იმყოფებოდა, სადაც მონაწილეობა მიიღო საერთაშორისო კონფერენციაში თემაზე „ამომრჩეველთა განათლება არჩევნებში ინკლუზიური და ინფორმირებული მონაწილეობისთვის“, რომლის მიზანი იყო აღნიშნული მიმართულებით საუკეთესო გამოცდილების, პრაქტიკისა და ახალი ინიციატივების გაზიარება.

კონფერენციის ფარგლებში სწავლების ცენტრის დირექტორმა გააკეთა მოხსენება საქართველოში საარჩევნო/სამოქალაქო კულტურის განვითარების ხელშეწყობის თემაზე და კონფერენციის მონაწილეებს მიაწოდა ინფორმაცია ამომრჩევლთა სხვადასხვა მიზნობრივი ჯგუფებისთვის დანერგილი საინფორმაციო-საგანმანათლებლო პროგრამების შესახებ (მოხსენება იხილეთ ბმულზე).

საქართველოსთან ერთად კონფერენციაში მსოფლიოს სხვადასხვა ქვეყნის დელეგატები მონაწილეობდნენ, მათ შორის, ამერიკის შეერთებული შტატების, მექსიკის, კანადის, ავსტრიის, მალაიზიის, ნამიბიის, კენიის, ბრაზილიის, ფიჯის, ინდონეზიის, ერაყის, ავღანეთის,  ლესოტოს, მალდივების, მავრიკიის, მიანმარის, ნეპალის, პაკისტანის, ფილიპინების, შრი-ლანკის, ტაილანდის, ტუნისის, უგანდის საარჩევნო ადმინისტრაციების ხელმძღვანელი პირები, ასევე ისეთი საერთაშორისო ორგანიზაციების წარმომადგენლები როგორიცაა: დემოკრატიისა და საარჩევნო დახმარების საერთაშორისო ინსტიტუტი (International IDEA), გაეროს განვითარების პროგრამა (UNDP),  საარჩევნო სისტემების საერთაშორისო ფონდი (IFES) და სხვ.

კონფერენციაზე მოწვეული სტუმრები შეხვდნენ ინდოეთის რესპუბლიკის პრეზიდენტს, რომელმაც გაამახვილა ყურადღება დემოკრატიული პროცესებისთვის საარჩევნო კულტურის განვითარების მნიშვნელობაზე. კონფერენაციის ფარგლებში ასევე მიღებულ იქნა ერთობლივი დეკლარაცია, რომელიც საერთაშორისო სახელმძღვანელო პრინციპებს განსაზღვრავს ამომრჩეველთა განათლების ეფექტიანად უზრუნველყოფის მიმართულებით.