2016 წლის 5 - 6 აგვისტოს სასტუმროში “ჰოლიდეი ინნ თბილისი” ტარდება ტრენინგი საქართველოს პარლამენტის 2016 წლის 8 ოქტომბრის არჩევნებში მონაწილეობის მსურველი პოტენციური კანდიდატი ქალებისათვის.

ტრენინგი, დღეს ცესკოს თავმჯდომარის მოადგილემ გიორგი შარაბიძემ და ცესკოს სწავლების ცენტრის ხელმძღვანელმა ნათია ზაალიშვილმა გახსნეს. მონაწილეებს ასევე ცესკოს წევრი ზურაბ ხრიკაძე მიესალმა, რომელმაც არჩევნებში გენდერული თანასწორობის საკითხებზე და ამ მიმართულებით საარჩევნო ადმინისტრაციის გენდერული თანასწორობის საბჭოს საქმიანობაზე ისაუბრა.

პროგრამის ფარგლებში მონაწილეობას იღებს სხვადასხვა პოლიტიკური პარტიისა და საინიციატივო ჯგუფის მიერ წარმოდგენილი 53 პოტენციური კანდიდატი ქალი. „მაჟორიტარ კანდიდატთა წარდგენის/რეგისტრაციის წესი, საარჩევნო კამპანიის ხარჯები და ანგარიშის წარდგენის წესი, ადმინისტრაციული რესურსები, საარჩევნო დავები“ - ეს იმ ძირითადი თემების ჩამონათვალია, რომელსაც ტრენინგის მონაწილეები გაეცნობიან.   

საინფორმაციო-საგანმანათლებლო პროექტს ცესკო და სწავლების ცენტრი სახელმწიფო აუდიტის სამსახურთან პარტნიორობით ახორციელებს. აღნიშნული ინიციატივა მიზნად ისახავს საარჩევნო პროცესში ქალთა მონაწილეობის გაძლიერების ხელშეწყობას.