2016 წლის 25 ივლისს, პარლამენტის არჩევნებისთვის საარჩევნო ადმინისტრაციისა და ადგილობრივი დამკვირვებელი ორგანიზაციების ერთობლივი ქცევის კოდექსის შემუშავების მიზნით შექმნილი სპეციალური სამუშაო ჯგუფის შეხვედრა გაიმართა, სადაც კოდექსის პროექტი განიხილეს. აღნიშნული ჯგუფის შემადგენლობაში არიან ცენტრალური საარჩევნო კომისიის წარმომადგენლები და ცესკოს სწავლების ცენტრის დირექტორი, ასევე სხვადასხვა არასამთავრობო ორგანიზაციის წარმომადგენლები („საქართველოს ახალგაზრდა იურისტთა ასოციაცია“, „სამართლიანი არჩევნებისა და დემოკრატიის საერთაშორისო საზოგადოება“, „არასამთავრობოთა კოალიცია სამოქალაქო განვითარებისთვის“, „განვითარებისა და დემოკრატიის ცენტრი“, „სამოქალაქო მოძრაობა - მრავალეროვანი საქართველო“, „ადამიანის უფლებათა ცენტრი“ და „საერთაშორისო გამჭვირვალობა - საქართველო“).

საარჩევნო ადმინისტრაციისა და ადგილობრივი დამკვირვებელი ორგანიზაციების ქცევის კოდექსი, მიზნად ისახავს 2016 წლის პარლამენტის არჩევნების სამართლიანად და გამჭვირვალედ ჩატარების ხელშეწყობას, კანონის უზენაესობის პატივისცემას და ძირითადი საარჩევნო პრინციპების განხორციელებას.

აღსანიშნავია, რომ 2016 წლის არჩევნებისთვის დამკვირვებლად რეგისტრირებულ ორგანიზაციებს, სურვილის შემთხვევაში, შესაძლებლობა ექნებათ ხელი მოაწერონ საბოლოო დოკუმენტს, რითაც ასევე გამოაცხადებენ თანხმობას იმოქმედონ ქცევის კოდექსში გაწერილი ნორმების მიხედვით.

სამუშაო ჯგუფი ქცევის კოდექსის საბოლოო პროექტს პირველ აგვისტომდე წარუდგენს.