2010 წლის 7 ივლისს ცენტრალურ საარჩევნო კომისიას, სსიპ საარჩევნო სისტემების განვითარების, რეფორმებისა და სწავლების ცენტრს, განათლების და მეცნიერების სამინისტროსა და გაეროს განვითარების პროგრამას (UNDP) შორის გაფორმდა ურთიერთგაგების მემორანდუმი.

მემორანდუმის ფარგლებში განსახორციელებელი პროექტის მიზანი იყო სკოლის მოსწავლეთა საარჩევნო კულტურის ამაღლება და სკოლებში თვითმმართველობის არჩევნების გამჭვირვალედ და სამართლიანად ჩატარების ხელშეწყობა.

პროექტში მონაწილეობა მიიღო რვა ქალაქის (გურჯაანი, მარნეული, რუსთავი, გორი, ხაშური, ახალციხე, ზუგდიდი, ქუთაისი, ბათუმი) 24 საჯარო სკოლამ, მათ შორის ერთი აზერბაიჯანულენოვანი (მარნეულის #3) და ერთი სომხურენოვანი (ახალციხის #3) სკოლა.

პირველ ეტაპზე მომზადდნენ ფასილიტატორები, რომლებმაც განახორციელეს ტრენინგების ციკლი სამოქალაქო აღზრდის პედაგოგებისთვის, მოსწავლეებისა და შესაბამისი საოლქო საარჩევნო კომისიის წევრებისათვის. მომზადდა ინსტრუქცია „სკოლის მოსწავლეთა თვითმმართველობის არჩევნებისათვის“. ინსტრუქციაში მოცემული იყო ადვილად შესრულებადი საარჩევნო პროცედურები, რჩევები არჩევნების ორგანიზატორთათვის, რათა საარჩევნო პროცესი სამართლიანი და გასაგები ყოფილიყო მოსწავლეთათვის.

პროექტის ფარგლებში, 2010 წლის 11-15 ოქტომბერს, საპილოტე სკოლებში ჩატარდა მე-7 მე-12 კლასების მოსწავლეთა თვითმმართველობების არჩევნები. შეიქმნა საარჩევნო კომისიები, რომლებიც მთლიანად დაკომპლექტდა სკოლის მოსწავლეებით. მათ გამოავლინეს არა მარტო საარჩევნო კანონმდებლობის ზოგადი ცოდნა, არამედ ის უნარ-ჩვევებიც, რომელიც აუცილებელია კომისიის თითოეული წევრისათვის, რაც მოსწავლეებისა და ტრენერების მჭიდრო თანამშრომლობის შედეგია.