2016 წლის 10 ივნისს ქვეყნის მასშტაბით, 2000-ზე მეტ საჯარო სკოლაში ტარდება თვითმმართველობის უმაღლესი ორგანოს - სამეურვეო საბჭოს წევრთა არჩევნები. საქართველოს განათლებისა და მეცნიერების სამინისტროს მიერ წარმოდგენილი თანამშრომლობის ინიციატივის საფუძველზე ცესკო და სწავლების ცენტრი უზრუნველყოფს საჯარო სკოლებში შიდა არჩევნების ჩატარების ხელშეწყობას, საგანმანათლებლო რესურსცენტრების წარმომადგენლების გადამზადების პროექტის განხორციელების გზით.

ცესკოს სწავლების ცენტრის მიერ შემუშავებული სატრენინგო პროგრამა „საჯარო სკოლის სამეურვეო საბჭოს წევრების არჩევნები და კენჭისყრის დღის პროცედურები“ გაიარა საგანმანათლებლო რესურსცენტრების 153 წარმომადგენელმა. ტრენინგები განხორციელდა ცესკოს სწავლების ცენტრში, რომლის მიმდინარეობა დასრულდა 2016 წლის 3 ივნისს.

საგანმანათლებლო რესურსცენტრებს ასევე გადაეცათ სწავლების ცენტრის მიერ მომზადებული საინფორმაციო-სასწავლო მასალა, მათ შორის, სკოლების სამეურვეო საბჭოების არჩევნების ჩატარებაზე პასუხისმგებელი საარჩევნო კომისიების წევრების მიერ ფუნქციების ეფექტიანად განხორციელების მიზნით შემუშავებული ე.წ. სამახსოვრო ინსტრუქციები. შეთანხმებული კონცეფციის შესაბამისად, სწავლების ცენტრის მიერ გადამზადებული საგანმანათლებლო რესურსცენტრების წარმომადგენლები, თავის მხრივ, უზრუნველყოფენ საჯარო სკოლებში შექმნილი საარჩევნო კომისიების წევრთა სწავლებას.

ცესკო და სწავლების ცენტრი აქტიურად თანამშრომლობს დაინტერესებულ მხარეებთან საარჩევნო კულტურის განვითარებაზე ორიენტირებული პროექტების განხორციელების კუთხით, მათ შორის, სხვადასხვა ორგანიზაციებში/დაწესებულებებში შიდა არჩევნების ჩატარების ხელშეწყობის მიმართულებით, რაც საარჩევნო ადმინისტრაციის 2016 წლის სამოქმედო გეგმით გაწერილ მიზნებსა და ამოცანებს ეხმიანება.