2010 წლის 25 მაისს, 13 საათზე, ვერის ბაღში საარჩევნო სისტემების განვითარების, რეფორმებისა და სწავლების ცენტრი აწყობს საინფორმაციო ხასიათის აქციას პირველკურსელი სტუდენტებისათვის, რომლებიც წელს პირველად მიიღებენ მონაწილეობას ადგილობრივი თვითმმართველობის არჩევნებში. ღონისძიებაში მონაწილეობას მიიღებენ ივანე ჯავახიშვილის სახელობის თბილისის სახელმწიფო უნივერსტეტის, თბილისის სახელმწიფო სამხატვრო აკადემიის, საქართველოს ტექნიკური უნივერსტეტისა და საქართველოს საზოგადოებრივ საქმეთა ინსტიტუტის სტუდენტები. აქციის მიზანია სტუდენტების მოტივირება 30 მაისის არჩევნებში მონაწილეობის მისაღებად და მათი ინფორმირება საარჩევნო უფლების სრულყოფილად რეალიზების უზრუნველსაყოფად.
აქცია წარიმართება შემდეგი ფორმატით:
- სტუდენტებს დაურიგდებათ ცენტრის მიერ მომზადებული ბუკლეტები, სადაც გაწერილი იქნება კენჭისყრის პროცედურები, რომელიც ამომრჩეველმა უნდა გაიაროს არჩევნების დღეს;
- ჩატარდება ინსცენირებული კენჭისყრის პროცესი
- მოეწყობა თბილისის სახელმწიფო სამხატვრო აკადემიის მიერ მოწოდებული ნახატების გამოფენა;
- სტუდენტებს ექნებათ შესაძლებლობა ნახატების დათვალიერების შემდეგ შევიდნენ სპეციალურად მოწყობილ უბანზე, გააკეთონ თავისი არჩევანი და გამოავლინონ საუკეთესო ნახატი;
- უბანზე შესვლისას სტუდენტები გაივლიან საარჩევნო კოდექსით დადგენილ კენჭისყრის შესაბამის პროცედურას;
- ხმების დათვლის შედეგად გამოვლენილ გამარჯვებულ მხატვარს გადაეცემა ცენტრის საჩუქარი;
- ლოტოტრონის მეშვეობით გათამაშდება არჩევნებთან დაკავშირებული კითხვები და გამოვლინდება ”ყველაზე ინფორმირებული პირველი ამომრჩეველი”, რომელსაც გადაეცემა შესაბამისი სერთიფიკატი.
