საარჩევნო ადმინისტრაციის წარმომადგენლებმა არჩევნების მართვის და უნარების განვითარების სასწავლო კურსი ნიუ დელიში გაიარეს. 12 დღის განმავლობაში მათ საარჩევნო ციკლის სხვადასხვა მნიშვნელოვან ასპექტებზე და საერთაშორისო გამოცდილების შესახებ მიიღეს ინფორმაცია. სწავლების ძირითადი თემები იყო: ამომრჩეველთა რეგისტრაცია, მათი ინფორმირება და განათლება საარჩევნო საკითხებზე, ხმის დათვლის პროცედურები, საარჩევნო ტექნოლოგიების სიახლეები და მათი დანერგვის პერსპექტივები, სხვადასხვა ქვეყნების წარმატებული გამოცდილებები, საარჩევნო კამპანიები, ელექტრონული სწავლების შესაძლებლობები, შედეგების მართვის სისტემები, გენდერული თანასწორობა და ა.შ.

სასწავლო კურსში 16 ქვეყნის 29 წარმომადგენელი მონაწილეობდა. ვიზიტის ფარგლებში მონაწილეები შეხვდნენ ინდოეთის ცესკოს თავმჯდომარეს, კომისიის წევრებს და ადმინისტრაციის ხელმძღვანელ პირებს.

არჩევნების მართვის და უნარების განვითარების სასწავლო კურსს ორგანიზება, ინდოეთის საარჩევნო კომისიის საარჩევნო მართვისა და დემოკრატიის საერთაშორისო ინსტიტუტმა გაუწია. სწავლება, ინდოეთის საგარეო საქმეთა სამინისტროს ტექნიკური და ეკონომიკური თანამშრომლობის პროგრამის (ITEC) ფარგლებში განხორციელდა.

კურსის ბოლოს მონაწილეებს სწავლების წარმატებით გავლის დამადასტურებელი სერტიფიკატები გადაეცათ.