საქართველოს ცენტრალურმა საარჩევნო კომისიამ და საარჩევნო სისტემების განვითარების, რეფორმებისა და სწავლების ცენტრმა ახალი საინფორმაციო-სასწავლო პროექტების პრეზენტაცია გამართეს. პროექტები, პროგრამა „საზოგადოება და არჩევნები“-ს ფარგლებში ხორციელდება.
„არჩევნები და ახალგაზრდა ამომრჩეველი“ და „საარჩევნო ადმინისტრატორის კურსები“, ეს ორი ახალი საინფორმაციო-სასწავლო პროექტია, რომლებიც საარჩევნო კულტურის განვითარებისა და მოქალქეების საზოგადოებრივ-პოლიტიკურ ცხოვრებაში ჩართულობის ხელშეწყობას ისახავს მიზნად.
საქართველოს განათლებისა და მეცნიერების სამინისტროსთან თანამშრომლობით საინფორმაციო-სასწავლო კურსი „არჩევნები და ახალგაზრდა ამომრჩეველი“ საპილოტე ფორმატში პირველ ეტაპზე განხორციელდება ეთნიკური უმცირესობებით დასახლებულ 14 რეგიონსა და 8 მაღალმთიან რეგიონში განლაგებულ 75 საჯარო სკოლის XI-XII კლასის მოსწავლეებისათვის. პროექტი ახალგაზრდებში სამოქალაქო ცნობიერების ამაღლებასა და სამოქალაქო პასუხისმგებლობის გაზრდას ემსახურება.
„საარჩევნო ადმინისტრატორის კურსები“ კი კენჭისყრის პროცედურების შესწავლას მოიცავს, რაც ხელს უწყობს კვალიფიციური საკადრო რესურსის ფორმირებას, შემდგომში საარჩევნო ადმინისტრაციისა და არჩევნებში ჩართული მხარეების მიერ პროფესიული კადრების შერჩევის მიზნით. პროექტი, ასევე პილოტურ რეჟიმში, ეთნიკური უმცირესობებით დასახლებულ 4 რეგიონში განხორციელდება.
სასტუმრო ამბასადორში დღეს გამართულ პრეზენტაციას ესწრებოდნენ როგორც ადგილობრივი, ისე საერთაშორისო ორგანიზაციების და პოლიტიკური პარტიების წარმომადგენლები.
