2015 წლის 15 ოქტომბერს, ცენტრალური საარჩევნო კომისიამ და საარჩევნო სისტემების განვითარების, რეფორმებისა და სწავლების ცენტრმა საპილოტე პროექტი „საარჩევნო განვითარების სკოლა-2015“ შეაჯამეს.

შეხვედრა, ცესკოს თავმჯდომარე თამარ ჟვანიამ, სწავლების ცენტრის დირექტორმა ნათია ზაალიშვილმა და საარჩევნო სისტემების საერთაშორისო ფონდის პროექტის ხელმძღვანელმა ნერმინ ნიშიჩმა გახსნა. შეხვედრაში 30 ტრენერი მონაწილეობდა, რომლებმაც „საარჩევნო განვითარების სკოლისთვის“ სპეციალური გადამზადება გაიარეს და იმავდროულად საოლქო საარჩევნო კომისიების წევრები არიან.

„საარჩევნო განვითარების სკოლა 2015“ - ის ფარგლებში, ახალგაზრდების დიდი ინტერესის გამო, ერთის მაგივრად სამი კურსი განხორციელდა; სულ სწავლებაში საარჩევნო თემებზე განათლება 627-მა ახალგაზრდამ მიიღო. სწავლება 10 საარჩევნო ოლქში განხორციელდა (თელავი, გურჯაანი, ახალციხე, მარნეული გორი, რუსთავი, ქუთაისი, ზუგდიდი, ოზურგეთი, ბათუმი).

საარჩევნო სისტემები, საარჩევნო ადმინისტრაცია, დემოკრატიული პრინციპები, არჩევითი ორგანოები საქართველოში, არჩევნებში ჩართული მხარეები, არჩევნების გამჭვირვალობა და ხელმისაწვდომობა, გენდერული თანასწორობა - ეს იმ თემების არასრული ჩამონათვალია, რომელზეც საარჩევნო განვითარების სკოლის მოსწავლეებმა ინფორმაცია კურსის ტრენერებისგან მიიღეს.

საარჩევნო განვითარების სკოლების საპილოტე პროექტი ცესკომ და სწავლების ცენტრმა, ახალგაზრდა იურისტთა ასოციაციასთან (საია) და საარჩევნო სისტემების საერთაშორისო ფონდთან (IFES) თანამშრომლობით, ევროპის საბჭოსა (CoE) და აშშ-ს განვითარების სააგენტოს (USAID) ფინანსური მხარდაჭერით განახორციელეს.

ცესკო და სწავლების ცენტრი მომავალში საარჩევნო განვითარების სკოლების საქართველოს მასშტაბით გაფართოებას გეგმავს, რაც საარჩევნო ადმინისტრაციას შესაძლებლობას მისცემს უფრო მეტ ახალგაზრდას გაუზიაროს საკუთარი ცოდნა და გამოცდილება.