ცენტრალურმა საარჩევნო კომისიამ „საარჩევნო განვითარების სკოლა 2015“-ისთვის ტრენერთა (ToT) მომზადება დაიწყო. 30 ივნისიდან 3 ივლისის ჩათვლით, გუდაურში, 36 ტრენერი საჭირო გადამზადებას გაივლის და შემდგომ „საარჩევნო განვითარების სკოლა 2015“-ის სასწავლო კურსს ჩაატარებს.

სწავლების დაწყებამდე, მონაწილეებს ცესკოს თავმჯდომარე თამარ ჟვანია, თავმჯდომარის მოადგილე გიორგი შარაბიძე, ცესკოს სწავლების ცენტრის ხელმძღვანელი ნათია ზაალიშვილი, საარჩევნო სისტემების საერთაშორისო ფონდის პროექტის (IFES) ხელმძღვანელი ნერმინ ნიშიჩი და ახალგაზრდა იურისტთა ასოციაციის იურისტი ირმა პავლიაშვილი მიესალმნენ. 

საარჩევნო განვითარების სკოლებში, რომლებიც 10 ქალაქში გაიხსნება 17-დან 25 წლამდე ახალგაზრდები საარჩევნო საკითხებს შეისწავლიან (კურსი 13-დან 24 ივლისის ჩათვლით გაიმართება);  სასწავლო კურსის მეშვეობით, გაიზრდება სამოქალაქო ჩართულობა, მოხდება არჩევნების პოპულარიზაცია ახალგაზრდებში. „საარჩევნო განვითარების სკოლა“ ასევე მიზნად ისახავს გაფართოვდეს და მოიცვას მთელი საქართველო, რაც საარჩევნო ადმინისტრაციის წარმომადგენლებს საშუალებას მისცემს, უფრო მეტ ახალგაზრდას გაუზიაროს საკუთარი პროფესიული გამოცდილება.

ტრენერები, რომლებიც გადამზადებას გადიან, საოლქო საარჩევნო კომისიების წევრები არიან. სასწავლო კურსს კი საარჩევნო სისტემების განვითარების, რეფორმებისა და სწავლების ცენტრის წარმომადენლები ახორციელებენ. კურსის გავლის შემდეგ, ტრენერები საარჩევნო განვითარების სკოლებში ისეთ მნიშვნელოვან საკითხებს შეასწავლიან, როგორებიცაა: საარჩევნო სისტემები, საარჩევნო ადმინისტრაცია, დემოკრატიული საარჩევნო პრინციპები, არჩევითი ორგანოები საქართველოში, არჩევნებში ჩართული მხარეები, არჩევნების გამჭვირვალობა და ხელმისაწვდომობა, გენდერული თანასწორობა და ა.შ. 

საარჩევნო განვითარების სკოლების საპილოტე პროექტს ცესკო და სწავლების ცენტრი, ახალგაზრდა იურისტთა ასოციაციასთან (საია) და საარჩევნო სისტემების საერთაშრისო ფონდთან (IFES) თანამშრომლობით, ევროპის საბჭოსა (CoE) და აშშ-ს განვითარების სააგენტოს (USAID) ფინანსური მხარდაჭერით ახორციელებს.