მიმდინარე წლის 26 ივნისს სწავლების ცენტრის პროექტის „სტუდენტური დებატ-კლუბის“ ფარგლებში გაიმართა პირველი შესარჩევი შეჯიბრი სტუდენტებს შორის.

თემაზე „პარტიულ სიებში გენდერული კვოტა უნდა იყოს თუ არა სავალდებულო“ დებატები გაიმართა გურამ თავართქილაძის სასწავლო უნივერსიტეტის, კავკასიის უნივერსიტეტისა და სოხუმის სახელმწიფო უნივერსიტეტის სტუდენტებს შორის, რომლებმაც მიმდინარე წელს გაიარეს სწავლების ცენტრის მიერ შემუშავებული სემესტრული სწავლება საარჩევნო სამართლის დარგში.

გამარჯვებული გუნდი გამოავლინა ჟიურიმ, რომელსაც წარმოადგენდა: ცესკოს თავმჯდომარე - თამარ ჟვანია, ცესკოს წევრები - ემზარ კაკულია, ლილი აბუთიძე და გიორგი ჭიქაბერიძე, ცესკოს თავმჯდომარის მრჩეველი - ანა მიქელაძე და სწავლების ცენტრის დირექტორი - ნათია ზაალიშვილი.

გამარჯვებული გუნდის წევრებს ცესკოს თავმჯდომარემ თამარ ჟვანიამ და სწავლების ცენტრის დირექტორმა ნათია ზაალიშვილმა გადასცეს სერტიფიკატები, რომელიც ადასტურებს მათ წარმატებით გადასვლას ფინალში. ფინალისტები არიან: გიორგი მამათელაშვილი, მარიამ წივწივაძე, ლორენა მეძმარიაშვილი (სოხუმის სახელმწიფო უნივერსიტეტი) და ნოდარ ინანეიშვილი (კავკასიის უნივერსიტეტი).

სტუდენტური დებატ-კლუბის მეორე შესარჩევი შეჯიბრი გაიმართება 7 ივლისს, 14:00 საათზე, თემაზე: „მოქალაქეს 16 წლის ასაკიდან უნდა მიენიჭოს აქტიური საარჩევნო უფლება“.

სტუდენტური დებატ-კლუბის პროექტის მიზანია სტუდენტების სამოქალაქო ცნობიერებისა და საარჩევნო კულტურის ამაღლების ხელშეწყობა, საარჩევნო პროცესებზე ახალგაზრდების ინტრესის გაღრმავება და არჩევნებში მონაწილეობის მისაღებად მათი მოტივირება, ასევე სტუდენტების პროფესიული ცოდნისა და უნარ-ჩვევების განვითარება.