ცესკოს დელეგაციამ რიგით მეათე საერთაშორისო საარჩევნო სიმპოზიუმში მიიღო მონაწილეობა. იამაიკაზე, გამართულ საპარლამენტო სწავლებების საერთაშორისო ცენტრის (ICPS) მიერ ორგანიზებულ ღონისძიებას, ცესკოს თავმჯდომარე თამარ ჟვანია, ცესკოს სწავლების ცენტრის დირექტორთან ნათია ზაალიშვილთან, კომისიის წევრებთან დავით გურგენიძესა და დიმიტრი ჯავახაძესთან, ასევე საზოგადოებასთან ურთიერთობის დეპარატმენტის ხელმძღვანელ ქეთევან დანგაძესთან ერთად ესწრებოდა.

საერთაშორისო სიმპოზიუმზე საქართველოს დელეგაციიდან  პრეზენტაციით წარსდგა ცესკოს თავმჯდომარე თამარ ჟვანია, რომელმაც ისაუბრა ცესკოს და სწავლების ცენტრთან ერთად განსახორციელებელ პროექტებზე ამომრჩეველთა სამოქალაქო განათლებასა და მედიასთან ურთიერთობების შესახებ. ცესკოს თავმჯდომარემ ასევე ყურადღება გაამახვილა საარჩევნო განვითარების სკოლებზე - საარჩევნო ადმინისტრაციის ახალ საპილოტე პროექტზე, რომელიც  უახლოეს მომავალში განახორციელდება.

სიმპოზიუმის ფარგლებში საარჩევნო ადმინისტრაციის მოხელეებმა საარჩევნო პროცესების და ადმინისტრირების შესახებ ერთმანეთს გამოცდილება გაუზიარეს; საერთაშორისო ექსპერტებთან ერთად განიხილეს ის გამოწვევები, რომლის წინაშეც სხვადასხვა ქვეყნის საარჩევნო ადმინისტრაციები დგანან. საარჩევნო ტექნოლოგიებზე მომუშავე კომპანიებმა კი მონაწილეებს ახალი ტექნოლოგიების და საარჩევნო პროცესებში მათი გამოყენების პერსპექტივების შესახებ მიაწოდეს ინფორმაცია.

26-29 მაისს ქალაქ მონტეგო ბეიში გამართულ მეათე სიმპოზიუმს ICPS-მა ორგანიზება იამაიკის საარჩევნო ადმინისტრაციასთან თანამშრომლობით გაუწია.