მიმდინარე წლის 11 - 13 მარტს, საარჩევნო სისტემების საერთაშორისო ფონდის (IFES) რეგიონალური ოფისის ორგანიზებით, ჩეხეთში, ქ. პრაღაში გაიმართა შეხვედრა სხვადასხვა ქვეყნების საარჩევნო ადმინისტრაციების სასწავლო ცენტრების წარმომადგენლებთან, კერძოდ, შეხვედრაში მონაწილეობა მიიღეს საქართველოს ცენტრალური საარჩევნო კომისიის სწავლების ცენტრის, აზერბაიჯანის, უკრაინისა და მოლდოვის საარჩევნო ადმინისტრაციების სასწავლო უწყებებისა და საერთაშორისო არასამთავრობო ორგანიზაციების წარმომადგენლებმა.

შეხვედრის ფარგლებში საქართველოსა და სხვა ქვეყნების დელეგაციების წარმომადგენლებმა ერთმანეთს გაუზირეს საარჩევნო სფეროში საქმიანობის გამოცდილება, იმსჯელეს დემოკრატიული არჩევნების ხელშეწყობის მიზნით საარჩევნო ცნობიერების ამაღლებაზე ორიენტირებული სასწავლო პროგრამების განხორციელების მნიშვნელობაზე, განიხილეს აღნიშნული მიმართულებით არსებულ გამოწვევები და გადაჭრის პრაქტიკული მექანიზმები. ამასთან ერთად, დაისახა სამომავლო პერსპექტივები სასწავლო უწყებების თანამშრომლობის განვითარების ხელშეწყობის მიზნით.

საქართველოს ცესკოს სწავლების ცენტრის დირექტორმა ნათია ზაალიშვილმა გააკეთა მოხსენება  სწავლების ცენტრის ფუნქციონირების ძირითად ასპექტებთან დაკავშირებით და შეხვედრაზე დამსწრე დელეგაციების წარმომადგენლებს მიაწოდა დეტალური ინფორმაცია სწავლების ცენტრის მისიისა და საქმიანობის შესახებ, როგორც საარჩევნო ისე  არასაარჩევნო პერიოდში, ისაუბრა ამომრჩეველებისა და არჩევნებში ჩართული სხვა მხარეების საარჩევნო ცნობიერების ამაღლების ხელშეწყობის მიზნით სწავლების ცენტრის მიერ შემუშავებული საგანმანათლებლო პროგრამების, სასწავლო მეთოდოლოგიებისა და მასალების შესახებ.

მოწვეულმა IFES ექსპერტებმა შეხვედრის მონაწილეებთან ერთად ასევე დეტალურად მიმოიხილეს სასწავლო პროგრამების მონიტორინგსა და შეფასებასთან დაკავშირებული სხვადასხვა საკითხები, მათ შორის, მონიტორინგის და შეფასების კონცეფციები,  სასწავლო პროგრამის შეფასების „კირკპატრიკის მოდელი“, მონიტორინგის გეგმის შემუშავებისა და ინდიკატორების განსაზღვრის საკითხი; რაოდენობრივი და ხარისხობრივი მონაცემების შეგროვება, მონიტორინგისა და შეფასების ანგარიში და სხვა.