2014 წლის 22 ოქტომბერს ცენტრალური საარჩევნო კომისიის თავმჯდომარემ, კომისიის წევრებთან, წარმომადგენლებთან და ცესკოს სწავლების ცენტრის ხელმძღვანელთან ერთად, შემაჯამებელი შეხვედრა გამართა თბილისსა და მცხეთა-თიანეთის საარჩევნო ოლქების წარმომადგენლებთან და ტრენერებთან.
შეხვედრაზე შეფასდა ცესკოს სწავლების ცენტრის მიერ წინასაარჩევნო პერიოდში ჩატარებული ტრენინგები, ასევე ქვედა დონის საარჩევნო ადმინისტრაციის მუშაობა, კომუნიკაციისა და კოორდინაციის საკითხები.
შეხვედრების განმავლობაში ცესკოს თავმჯდომარემ თამარ ჟვანიამ და კომისიის წევრებმა საოლქო საარჩევნო კომისიების თავმჯდომარეებისგან მიიღეს ინფორმაცია თვითმმართველობის არჩევნებზე მიღებული გამოცდილებისა და არსებული გამოწვევების შესახებ, მათ შორის შეაფასეს წინასაარჩევნო პერიოდში და კენჭისყრის დღეს მედიასთან მათი ურთიერთობების გამოცდილება, ასევე, მოისმინეს შესაბამისი წინადადებები და რეკომენდაციები, რაც საარჩევნო ადმინისტრაციას სამომავლო აქტივობების უკეთ დაგეგმარებაში შეუწყობს ხელს.
იგივე სახის შემაჯამებელი შეხვედრები 5-12 აგვისტოს უკვე გაიმართა საქართველოს რეგიონებში.
