26 მარტს ცენტრალური საარჩევნო კომისიის ინიციატივით "ქორთიარდ მარიოტში”, 16:00 საათზე, ”საარჩევნო სისტემების განვითარების, რეფორმებისა და სწავლების ცენტრის” (საჯარო სამართლის იურიდიული პირი) ოფიციალური მიღება გაიმართება. ცენტრის წარმომადგენლები დამსწრე საზოგადოებას ცენტრის მიზნებსა და ამოცანებს გააცნობენ.

ცენტრი “საქართველოს საარჩევნო კოდექსში” 2009 წლის 28 დეკემბერს განხორციელებული ცვლილებების შესაბამისად შეიქმნა და მიზანია საარჩევნო რეფორმებისა და მონიტორინგის განხორციელება, საარჩევნო პროცესში მონაწილე სუბიექტების სწავლება და კვალიფიკაციის ამაღლება, საერთაშორისო სტანდარტების შესაბამისი თავისუფალი და სამართლიანი არჩევნების ჩატარების უზრუნველყოფა.

”საარჩევნო სისტემების განვითარების, რეფორმებისა და სწავლების ცენტრი” ჩაუტარებს ტრეინინგს საოლქო და საუბნო საარჩევნო კომისიების წარმომადგენლებს. ასევე არასამთავრობო ორგანიზაციებზე გასცემს გრანტებს წინასაარჩევნო გარემოს მონიტორინგისათვის.

საგრანტო სრული თანხა შეადგენს 250.000 ლარს, თემატიკა განისაზღვრა ოთხი ძირითადი მიმართულებით: სამოქალაქო სექტორის ხელშეწყობა, მოწყვლადი ამომრჩევლის ინფორმირება, არჩევნებში პირველად მონაწილე ამომრჩევლისთვის საინფორმაციო კამპანია და კამპანია ”მოდი არჩევნებზე”.

ცენტრმა 24-25 მარტს ”ქორთიარდ მარიოტში”ჩაატარა ფასილიტატორთა ტრეინინგის I ეტაპი და გამოცხადებული აქვს საქართველოს საარჩევნო ადმინისტრაციის - საუბნო საარჩევნო კომისიების წევრების ტრენერთა შესარჩევი კონკურსი.

ტრენინგების პროგრამას ცენტრი ახორციელებს გაეროს განვითარების პროგრამის პროექტის „დიალოგისა და შესაძლებლობათა განვითარების ხელშეწყობა ეფექტური ეროვნული საარჩევნო პროცესებისთვის“ მხარდაჭერით.

”საარჩევნო სისტემების განვითარების, რეფორმებისა და სწავლების ცენტრი” საარჩევნო პროცესებისადმი ამომრჩეველთა ნდობის ამაღლებაზე და მიუკერძოებელი, გამჭირვალე არჩევნების ჩატარების ხელშეწყობაზე იზრუნებს.