23 ოქტომბერს საარჩევნო ადმინისტრაციის წარმომადგენლები სახალხო დამცველსა და მის უწყებასთან არსებულ ეროვნულ უმცირესობათა საბჭოს წევრებს შეხვდნენ. ცენტრალური საარჩევნო კომისიის თავმჯდომარემ შეხვედრის მონაწილეებს ცესკოს მიერ ეროვნული უმცირესობების წარმომადგენელ ამომრჩეველთათვის თანაბარი საარჩევნო გარემოს შექმნის მიზნით განხორციელებული პროექტების შესახებ მიაწოდა ინფორმაცია.
აღნიშნული მიმართულებით განხორციელდა სხვადასხვა სახის ღონისძიებები, საარჩევნო სისტემების განვითარების, რეფორმებისა და სწავლების ცენტრის მიერ აზერბაიჯანულ და სომხურ ენებზე ითარგმნა სახელმძღვანელოები, პოსტერები, ამომრჩევლის სამახსოვრო და საუბნო საარჩევნო კომისიის წევრთა სამახსოვრო ინსრტუქციები, ასევე სასწავლო ფილმი „კენჭისყრის დღის პროცედურები“.
შეხვედრა 2012 წლის 7 ივნისს, საქართველოს ცენტრალური საარჩევნო კომისიასა და სახალხო დამცველს (სახალხო დამცველთან არსებული ეროვნულ უმცირესობათა საბჭოს სახელით) შორის გაფორმებული ურთიერთთანამშრომლობის მემორანდუმის ფარგლებში გაიმართა.
