2025 წლის 13 მაისიდან, ცესკომ და სწავლების ცენტრმა სასწავლო პროექტის „საარჩევნო ადმინისტრატორის კურსები“ იმპლემენტაცია დაიწყო.

პროექტის განხორციელების არეალი მასშტაბურია, ტარდება საქართველოს 64-ვე მუნიციპალიტეტში. მასში მონაწილეობის მისაღებად 11 500-მდე მოქალაქე დარეგისტრირდა.

სასწავლო პროგრამა მიზნად ისახავს საუბნო საარჩევნო კომისიების პოტენციური საკადრო რესურსის გადამზადებას, შემდგომში საარჩევნო ადმინისტრაციის მიერ კვალიფიციური საარჩევნო ადმინისტრატორების შერჩევის ხელშეწყობის უზრუნველსაყოფად. კურსის ძირითად მიმართულებას არჩევნების მოდერნიზაციის ტენდენციების განხილვა და საარჩევნო ელექტრონული აპარატების გამოყენებით კენჭისყრის პროცესის ადმინისტრირების პრაქტიკული სწავლება წარმოადგენს.

კურსი თეორიული და პრაქტიკული სწავლების მეთოდოლოგიაზე დაფუძნებით პირისპირ ფორმატში ხორციელდება. მონაწილეები, ამომრჩევლის სერვისზე ორიენტირებით, დეტალურად ეცნობიან საუბნო საარჩევნო კომისიის საქმიანობის პრაქტიკულ ასპექტებს, მათ შორის, სატრენინგო რეჟიმში განახორციელებენ ამომრჩეველთა ვერიფიკაციის აპარატების, ხმის დათვლის სპეციალური ელექტრონული აპარატების და კანონმდებლობით განსაზღვრული მონაცემების გადაცემისთვის განკუთვნილი პლანშეტური კომპიუტერების მართვას. ამასთან, მუნიციპალიტეტების ორგანოთა არჩევნების პროცედურული სპეციფიკის გათვალისწინებით, საარჩევნო ბიულეტენების დათვლის და კენჭისყრის შედეგების შემაჯამებელი ოქმების შედგენის პროცესის პრაქტიკაში ტრანსფორმაციის მიზნით, მონაწილეების უშუალო ჩართულობით ტარდება აღნიშნული პროცედურების მოდელირება. სრული კურსის გავლის შემთხვევაში გაიცემა სერტიფიკატი.

პროექტი „საარჩევნო ადმინისტრატორის კურსები“ 2025 წლის 13-29 მაისის პერიოდში განხორციელდება. სასწავლო კურსის ჩატარებას სწავლების ცენტრის მიერ გადამზადებული 231 ტრენერი უზრუნველყოფს.