საქართველოს პარლამენტის 2024 წლის 26 ოქტომბრის არჩევნებისთვის, სსიპ საარჩევნო სისტემების განვითარების, რეფორმებისა და სწავლების ცენტრმა ელექტრონული საინფორმაციო-სასწავლო პროგრამა „საარჩევნო უბანზე ელექტრონული აპარატების გამოყენებით ხმის მიცემის პროცედურა“ შეიმუშავა.

აღნიშნული წარმოადგენს დამატებით რესურსს საარჩევნო რეფორმით გათვალისწინებულ ტექნოლოგიურ სიახლეებთან ადაპტაციის ხელშეწყობის მიზნით. განკუთვნილია  საუბნო საარჩევნო კომისიების წევრებისა და სხვა დაინტერესებული პირებისთვის.   

პლატფორმა მომხმარებლებს ანიჭებს შესაძლებლობას, დროსა და სივრცეში შეუზღუდავად, ეწვიონ საინფორმაციო-სასწავლო პროგრამას და კენჭისყრის დღემდე განიმტკიცონ მიღებული ცოდნა ელექტრონული აპარატების გამოყენებით ამომრჩევლებისთვის კვალიფიციური სერვისის მიწოდების საკითხებზე.   

სიახლეებზე ორიენტირებით, პროგრამაში აქცენტირებულად შემდეგი საკითხებია განხილული:

• როგორ ემზადება საუბნო საარჩევნო კომისია კენჭისყრის დღეს და როგორ წარიმართება ვერიფიკაციის აპარატების, ხმის დათვლის ელექტრონული აპარატების გააქტიურების პროცედურა კენჭისყრის პროცესის დასაწყებად;
• რა სტანდარტების დაცვით ემსახურება საუბნო საარჩევნო კომისია ამომრჩეველს და როგორ მიმდინარეობს საარჩევნო უბანზე ხმის მიცემის პროცედურა ელექტრონული აპარატების გამოყენებით.

2024 წლის 26 ოქტომბრის არჩევნებისთვის სწავლების ცენტრის მიერ შემუშავებული ელექტრონული საინფორმაციო-სასწავლო პროგრამა, ვებ-გვერდზე გასაჯაროებული სახელმძღვანელო ინსტრუქციები და სამახსოვრო ინსტრუქციები საჯარო პლატფორმის არსებითი ნაწილია. ნებისმიერ დაინტერესებულ პირს აქვს საარჩევნო ინფორმაციაზე თანაბარი წვდომის შესაძლებლობა, რაც, თავის მხრივ, ემსახურება პროცედურებზე ერთგვაროვანი გაგების/აღქმის ჩამოყალიბებას და მიზნად ისახავს კენჭისყრის  პროცესში ჩართული ყველა მხარის მიერ პროფესიონალიზმზე დაფუძნებით საქმიანობის განხორციელების ხელშეწყობას დემოკრატიული არჩევნების უზრუნველსაყოფად.

ელექტრონული საინფორმაციო-სასწავლო პროგრამა იხილეთ ბმულზე.