2024 წლის 15 ოქტომბერს, სწავლების ცენტრმა სპეციალური პენიტენციური სამსახურის პენიტენციური დაწესებულებების წარმომადგენლებთან საინფორმაციო შეხვედრა ჩაატარა.

აღნიშნული პროექტი საარჩევნო ადმინისტრაციას და პენიტენციურ სამსახურს შორის ეფექტიანი თანამშრომლობის ასპექტებს მოიცავს და პენიტენციურ დაწესებულებებში მყოფი ამომრჩევლების 26 ოქტომბრის არჩევნებში მონაწილეობის ხელშეწყობას ემსახურება.

სწავლების ცენტრის მიერ შემუშავებული პროფილური პროგრამის ფარგლებში მონაწილეები შემდეგ ძირითად საკითხებს გაეცნენ: პენიტენციურ დაწესებულებაში აქტიური საარჩევნო უფლების მქონე პირები და უფლების რეალიზების გარანტიები; საარჩევნო უფლების მქონე ბრალდებულთა/მსჯავრდებულთა ინფორმირების მიზნით სააგიტაციო მასალის და ხმის მიცემის პროცედურების ამსახველი საინფორმაციო რესურსის განთავსების წესი; პენიტენციურ დაწესებულებაში შექმნილი საარჩევნო უბნის მოწყობა და უსაფრთხოების სტანდარტები; ხმის მიცემის პროცედურა პენიტენციურ დაწესებულებაში შექმნილ საარჩევნო უბანზე/გადასატანი საარჩევნო ყუთის მეშვეობით; ამომრჩევლის ხმის მიცემის ფარულობის, ნების თავისუფალი გამოვლენის, პერსონალური მონაცემების დაცვის გარანტიები; კენჭისყრის შენობაში ყოფნის უფლების მქონე პირები და მათი უფლებრივი მდგომარეობა; პენიტენციურ დაწესებულებაში შექმნილ საარჩევნო უბანზე კენჭისყრის მიმდინარეობის ფოტო-ვიდეო გადაღების რეგულაციები.

საინფორმაციო შეხვედრა დისტანციურ ფორმატში გაიმართა და მასში მონაწილეობა 14 პენიტენციური დაწესებულების 27-მა წარმომადგენელმა მიიღო.