მიმდინარე წლის 1 ივლისს დაიწყო საარჩევნო ადმინისტრაციის მოხელის სასერტიფიკაციო გამოცდები, რომელიც ხორციელდება ელექტრონული ტესტირების მეთოდით.

სერტიფიცირების მსურველებს შესაძლებლობა ეძლევათ გაიარონ ტესტირება ელექტრონულ რეჟიმში და საკმარისი ქულების დაგროვების შემთხვევაში მიიღონ საარჩევნო ადმინისტრაციის მოხელის სერტიფიკატი.

გამოცდის ხანგრძლივობა ერთ საათს შეადგენს. თითოეული გამოსაცდელისთვის ელექტრონულ პროგრამაში ავტომატურად, შემთხვევითი შერჩევის პრინციპით 30 საგამოცდო ტესტი შეირჩევა. დადებითი შეფასების მისაღებად გამოსაცდელმა უნდა დააგროვოს 24 ქულა. გამსვლელი ქულის მიღების შემთხვევაში გამოსაცდელს ადგილზე გადაეცემა სერტიფიკატი.

27 მაისიდან ყველა დაინტერესებულ მხარეს შეეძლო ეხილა საგამოცდო ტესტები (რომლებიც უცვლელი ფორმით გამოიყენება სასერტიფიკაციო გამოცდის ჩაბარებისას), როგორც ცენტრალური საარჩევნო კომისიის, ისე საარჩევნო სისტემების განვითარების, რეფორმებისა და სწავლების ცენტრის ვებ-გვერდებზე.

27 მაისიდან 21 ივნისის ჩათვლით სერტიფიცირებისთვის 8198-მა მსურველმა გაიარა რეგისტრაცია. ინტერნეტის მეშვეობით მსურველს სულ რამდენიმე წუთში შეეძლო რეგისტრაციის გავლა, გამოცდაზე გამოცხადების თარიღის და დროის შერჩევა.

გამოცდაზე დაკვირვების უზრუნველყოფის მიზნით დარეგისტრირდა შვიდი არასამთავრობო ორგანიზაცია, 63 დამკვირვებლით:

• „დემოკრატიის ქსელი“
• ”მომავლის არჩევანი”
• „ევროპულ დემოკრატიული ცენტრი“
• „სამოქალაქო ინიციატივა-სამართლიანი არჩევნები“
• ”საარჩევნო გარემოს განვითარების ცენტრი”
• „ახალი თაობა დემოკრატიული არჩევნები“
• „დემოკრატიისა და სამართლებრივი განვითარების საზოგადოება“