2024 წლის 24 სექტემბერს, სწავლების ცენტრის დირექტორი ნათია ზაალიშვილი საერთაშორისო რესპუბლიკური ინსტიტუტის (IRI) გრძელვადიანი სადამკვირვებლო მისიის დირექტორს შონ დანს და მისიის გრძელვადიან დამკვირვებლებს ემილ შაქირ უულუს და სლავომირ ჟიშკას შეხვდა.

სწავლების ცენტრის დირექტორმა დეტალურად განიხილა 2024 წლის 26 ოქტომბრის არჩევნებისთვის შემუშავებული საოლქო და საუბნო საარჩევნო კომისიების პროფესიული გადამზადების პროგრამები. საარჩევნო კომისიების კვალიფიციური პერსონალით დაკომპლექტების ხელშეწყობის საკითხზე, სადამკვირვებლო მისიის წარმომადგენლებს ასევე მიეწოდათ ინფორმაცია სერტიფიცირების საგამოცდო ციკლის შესახებ, რომლის ადმინისტრირება სწავლების ცენტრმა, ცესკოსთან თანამშრომლობით, 2023 წლის სექტემბრიდან 2024 წლის ივლისის ჩათვლით პერიოდში უწყვეტ რეჟიმში ქვეყნის მასშტაბით განახორციელა.

შეხვედრაზე სწავლების ცენტრის დირექტორმა ყურადღება გაამახვილა ამომრჩეველთა მასშტაბური ინფორმირების კამპანიის მექანიზმებზე და ჩართული მხარეების საარჩევნო ცნობიერების ამაღლებაზე ორიენტირებით განხორციელებულ საინფორმაციო-სასწავლო პროექტებზე, რაც მიზნად ისახავს ტექნოლოგიურ სიახლეებზე ინფორმირებას, სიახლეებთან ადაპტაციის ხელშეწყობას და ერთგვაროვანი აღქმის ჩამოყალიბებას შესაბამის რეგულაციებზე.

შეხვედრის დასასრულს, მონაწილეები შეთანხმდნენ, რომ კარგი პრაქტიკის შესაბამისად, სწავლების ცენტრი განგრძობითი თანამშრომლობის საფუძველზე სადამკვირვებლო მისიის წარმომადგენლებს ეტაპობრივად მიაწვდის ინფორმაციას დაგეგმილ აქტივობებზე. სწავლების ცენტრი მნიშვნელოვნად აფასებს ინსტიტუციის საქმიანობის მიმართ საერთაშორისო სადამკვირვებლო მისიის მაღალ ინტერესს, რაც საერთო მიზანს - დემოკრატიული საარჩევნო პროცესების მხარდაჭერას ემსახურება.