საერთაშორისო სტანდარტების შესაბამისად საარჩევნო პროცესის ადმინისტრირების ხელშეწყობის მიზნით, საარჩევნო კომისიების პროფესიული გადამზადების პროგრამები გრძელდება.

მიმდინარე ეტაპზე, საქართველოს პარლამენტის არჩევნებისთვის მოსამზადებელი ფაზის ფარგლებში, სწავლების ცენტრმა მასშტაბური საინფორმაციო-სასწავლო პროექტი 73-ვე საოლქო საარჩევნო კომისიისთვის ჩაატარა. საარჩევნო ადმინისტრატორების საქმიანობის მართვის ეფექტიანობის ზრდისა და ამ პროცესში საარჩევნო კომისიების ყველა წევრის ჩართულობის ხელშეწყობის მიზნით, სწავლების ცენტრის პროგრამა საოლქო საარჩევნო კომისიების სრული შემადგენლობის მონაწილეობით განხორციელდა.

საინფორმაციო-სასწავლო პროგრამა 12 სექტემბერს ჰიბრიდული მეთოდოლოგიით წარიმართა. საოლქო საარჩევნო კომისიებთან დისტანციურ ფორმატში გამართული შეხვედრა სწავლების ცენტრის დირექტორმა ნათია ზაალიშვილმა გახსნა. მან საოლქო საარჩევნო კომისიების პროფესიული გადამზადების მნიშვნელობაზე გაამახვილა ყურადღება და აღნიშნა, რომ შემუშავებული პროგრამა სადამკვირვებლო ორგანიზაციების ანგარიშებში ასახულ რეკომენდაციებს პასუხობს, რომელთა გათვალისწინებით აქცენტი კომისიების წევრების საარჩევნო სიახლეებთან ადაპტირებას ეთმობა.

დისტანციური შეხვედრის ფარგლებში სწავლების ცენტრის ექსპერტ-ტრენერებმა მონაწილეებთან დეტალურად განიხილეს საოლქო საარჩევნო კომისიის მანდატს მიკუთვნებული საკითხები, საარჩევნო ტექნოლოგიური სიახლეები და ამომრჩევლების კვალიფიციურ სერვისზე ორიენტირებით განსახორციელებელი აქტივობების პრაქტიკული ასპექტები. საარჩევნო კომისიების წევრები შემდეგ ძირითად საკითხებს გაეცნენ:

• არჩევნების ჩატარების საერთაშორისო სტანდარტები; კანონმდებლობის ერთგვაროვნად გამოყენება და ზედამხედველობის მექანიზმის მნიშვნელობა ქვემდგომი საუბნო საარჩევნო კომისიების საქმიანობაზე;
• კენჭისყრის შენობების მოწყობის, აპარატებით/ინვენტარით აღჭურვის უზრუნველყოფა; კენჭისყრის დღეს საუბნო საარჩევნო კომისიებთან კომუნიკაციის/კოორდინაციის ასპექტები;  
• კენჭისყრის პროცესის წარმართვა ელექტრონული ტექნოლოგიების გამოყენებით; ამომრჩევლის ნების თავისუფალი გამოვლენის გარანტირებულობა; არჩევანის ფარულობის და საარჩევნო უბანზე ამომრჩევლის პერსონალური მონაცემების დაცვა; ინკლუზიური საარჩევნო გარემოს მხარდაჭერა;
• კენჭისყრის პროცესზე შეუფერხებელი დაკვირვების პირობების უზრუნველყოფა;
• საუბნო საარჩევნო კომისიების კენჭისყრის წინასწარი შედეგების და შემაჯამებელი ოქმის საჯაროობა; საოლქო საარჩევნო კომისიის მიერ კენჭისყრის შედეგების შეჯამების პროცესი (მათ შორის, საუბნო საარჩევნო კომისიის კენჭისყრის შედეგების გადამოწმებისა და ხელახლა დათვლის საფუძვლები და წესი);
• საოლქო საარჩევნო კომისიის მიერ კენჭისყრის განცხადებებსა და საჩივრებზე რეაგირების წესი.

სწავლების ცენტრის ონლაინ მოდულის დასრულებისთანავე, საოლქო კომისიების შენობებში (ადგილზე) გაიმართა აპარატების მუშაობის დემონსტრირების პროცესი, კომისიების წევრთა უშუალო ჩართულობით. მონაწილეები პრაქტიკაში გაეცნენ ამომრჩეველთა ვერიფიკაციის აპარატის, ხმის დათვლის სპეციალური აპარატის და წინასწარი შედეგების გადაცემისთვის განკუთვნილი პლანშეტის ფუნქციონალს.

საინფორმაციო-სასწავლო პროგრამაში მონაწილეობა 73 საოლქო საარჩევნო კომისიის 1117-მა წევრმა მიიღო. დისტანციურ შეხვედრას ეროვნულ-დემოკრატიული ინსტიტუტის (NDI) სადამკვირვებლო მისიის წარმომადგენელი დაესწრო. სწავლების ცენტრი მნიშვნელოვნად აფასებს არჩევნების მომზადების პროცესში მიმდინარე საინფორმაციო-სასწავლო პროექტების მიმართ სადამკვირვებლო მისიების მაღალ ინტერესს.