საოლქო საარჩევნო კომისიების ხელმძღვანელი პირები  სამუშაო შეხვედრაში  სახელწოდებით „საარჩევნო დავების გადაწყვეტა (ერთგვაროვანი და ეფექტიანი განხილვა და გადაწყვეტილების სათანადოდ დასაბუთება)“  იღებენ მონაწილეობას.

შეხვედრა დღეს ცენტრალური საარჩევნო კომისიის თავმჯდომარის მოადგილე გიორგი შარაბიძემ, საარჩევნო სისტემების საერთაშორისო ფონდის (IFES) საქართველოს წარმომადგენლობის დირექტორმა რენატა ლევოვსკიმ და ევროპის საბჭოს (CoE) საპარლამენტო ასამბლეის სამდივნოს, საპარლამენტო და საარჩევნო თანამშრომლობის განყოფილების პროექტის უფროსმა ოფიცერმა მაია ჯორჯიკიამ გახსნეს. როგორც შეხვედრის დაწყებისას გიორგი შარაბიძემ აღნიშნა,  ადგილობრივი და საერთაშორისო გამოცდილებისა და პრაქტიკის შესწავლა, განხილვა და გათვალისწინება მნიშვნელოვანია და ხელს უწყობს საარჩევნო პროცესის მაღალ პროფესიულ დონეზე ადმინისტრირებას.

„ღონისძიება თავის მხრივ პასუხობს ეუთო/ოდირის იმ მნიშვნელოვან რეკომენდაციებს, რომელიც წინა საერთო არჩევნების შემდგომ გამოქვეყნდა. მნიშვნელოვანია, რომ 26 ოქტომბრის არჩევნებამდე საოლქო საარჩევნო კომისიის ხელმძღვანელი პირები მიიღებენ დეტალურ ინფორმაციას საარჩევნო დავების საერთაშორისო სტანდარტების შესახებ“, - განაცხადა გიორგი შარაბიძემ ღონისძიების მიმდინარეობისას.

შეხვედრის მონაწილეებს საარჩევნო დავებთან დაკავშირებით ინფორმაციას ევროპის საბჭოს ექსპერტი შოთა გეწაძე, IFES-ის ექსპერტი ტატიანა ჰილშერ-ბოგუსევიჩი, ცესკოს იურიდიული დეპარტამენტის უფროსი გიორგი სანტურიანი და ცესკოს სწავლების ცენტრის სასწავლო პროგრამების სამსახურის იურისტ ანალიტიკოსი დავით მაკარიძე აცნობენ. შეხვედრის განმავლობაში მონაწილეები ისეთ  მნიშვნელოვან საკითხებს განიხილავენ, როგორიცაა: საკანონმდებლო ცვლილებები - საარჩევნო დავების წარმოება და ერთგვაროვანი განხილვა; საარჩევნო დავის ეფექტიანი გადაწყვეტა - საერთაშორისო ვალდებულებები, ეუთოს სტანდარტები და რეკომენდაციები და შედარებითი პრაქტიკა; საარჩევნო დავებზე ეროვნული სასამართლო პრაქტიკის მიმოხილვა - გადაწყვეტილების დასაბუთების სტანდარტები.

სამუშაო შეხვედრა საარჩევნო სისტემების საერთაშორისო ფონდისა (IFES) და ევროპის საბჭოს (CoE) მხარდაჭერით ხორციელდება და მასში მონაწილეობას საოლქო საარჩევნო კომისიების ხელძღვანელი პირები ეტაპობრივად იღებენ.