მიმდინარე წლის 26 მაისიდან - 14 ივნისის ჩათვლით ცენტრალური საარჩევნო კომისიის თავმჯდომარე ზურაბ ხარატიშვილი და საარჩევნო სისტემების განვითარების, რეფორმებისა და სწავლების ცენტრის დირექტორი ნათია ზაალიშვილი ოფიციალური ვიზიტით იაპონიასა და კორეაში იმყოფებოდნენ.

ქ. ტოკიოში საარჩევნო ადმინისტრაციის წარმომადგენლები დაესწრნენ სემინარს, სადაც ეროვნული ასამბლეისა და არჩევნების საკითხები განიხილებოდა. სემინარის მონაწილეები გაეცნენ სხვადსხვა ქვეყნების გამოცდილებას, განიხილეს დემოკრატიული მმართველობის პრინციპები და ამ მიმართულებით შემდგომი განვითარების საშუალებები. ქართული დელეგაცია, ასევე, გაეცნო ქვეყანაში არსებულ თანამედროვე საარჩევნო ტექნოლოგიებს და ინოვაციებს.

ცესკოსა და სწავლების ცენტრის წარმომადგენლები იაპონიაში ქვეყნის საერთაშორისო თანამშრომლობის სააგენტოს (JICA) მიწვევით იმყოფებოდნენ.

12-14 ივნისს კი დელეგაცია კორეაში იმყოფებოდა, სადაც კორეისა და საქართველოს საარჩევნო ადმინისტრაციებს შორის ურთიერთგაგების მემორანდუმი გაფორმდა. დოკუმენტი ურთიერთგამოცდილების გაზიარებას და ორივე საარჩევნო ადმინისტრაციაში საერთაშორისო სტანდარტების დონის პოტენციურ ამაღლებას ითვალისწინებს. საქართველოს და კორეის საარჩევნო ადმინისტრაციების წარმომადგენლებმა თანამშრომლობის მომდევნო ეტაპი განიხილეს.