ცენტრალურ საარჩევნო კომისიაში (ცესკო) შეზღუდული შესაძლებლობების მქონე პირთა საკითხებზე მომუშავე ჯგუფის შეხვედრა გაიმართა. შეხვედრა ცესკოს თავმჯდომარის მოადგილე გიორგი შარაბიძემ გახსნა და საქართველოს პარლამენტის 2024 წლის 26 ოქტომბრის არჩევნებისთვის ელექტრონული ტექნოლოგიების გამოყენების შესახებ ამომრჩეველთა, მათ შორის შეზღუდული შესაძლებლობების მქონე პირთა, ინფორმირების მიზნით ადმინისტრაციის მიერ უკვე განხორციელებულ და მიმდინარე საქმიანობაზე ისაუბრა.

სამუშაო ჯგუფის ხელმძღვანელმა სოფიო სიჭინავამ მონაწილეებთან ერთად განიხილა შეზღუდული შესაძლებლობების მქონე პირთა მიმართულებით სადამკვირვებლო ორგანიზაციების, მათ შორის ეროვნულ-დემოკრატიული ინსტიტუტის (NDI) და გაერთიანებული ერების ორგანიზაციის რეკომენდაციები, ასევე ისაუბრა საარჩევნო ადმინისტრაციის მიერ აღნიშნული მიმართულებით განსახორციელებული პროექტებისა და შეზღუდული შესაძლებლობების მქონე ამომრჩეველთა ინფორმირებისთვის გამოყენებული მექანიზმების შესახებ. მან ასევე ისაუბრა საარჩევნო ელექტრონული ტექნოლოგიების გამოყენების შესახებ დაგეგმილი ინფორმირების კამპანიის მნიშვნელობაზე და საარჩევნო ადმინისტრაციის მიერ დაგეგმილი იმიტირებული ელექტრონული არჩევნების გამართვასთან დაკავშირებულ საკითხებზე. შეხვედრაზე გაიმართა შშმ პირების მონაწილეობით გადაღებული იმ საინფორმაციო ვიდეორგოლის ჩვენება და განხილვა, რომელშიც ასახულია ელექტრონული ტექნოლოგიების გამოყენებით ხმის მიცემის პროცედურები.

შეხვედრის მონაწილეებმა ასევე ისაუბრეს საარჩევნო ადმინისტრაციის საგანმანათლებლო პროექტების შესახებ, რომელიც უტარდებათ საუბნო საარჩევნო კომისიების წევრებს შშმ პირებთან ურთიერთობის ეტიკეტთან დაკავშირებით.

სამუშაო ჯგუფი ცესკოში შშმ ამომრჩეველთა თანაბარი საარჩევნო გარემოს ხელშეწყობის მიზნით არის შექმნილი. ჯგუფის შემადგენლობაში შედიან საარჩევნო ადმინისტრაციის, საერთაშორისო და ადგილობრივი არასამთავრობო ორგანიზაციების, სახელმწიფო უწყებებისა და სახალხო  დამცველის ოფისის წარმომადგენლები (შშმ პირთა თემებზე მომუშავე შესაბამისი უწყებების მოწვეული წარმომადგენლები).