ცენტრალურ საარჩევნო კომისიაში (ცესკო) ეთნიკური უმცირესობების საკითხებზე მომუშავე ჯგუფის შეხვედრა გაიმართა. შეხვედრა ცესკოს თავმჯდომარის მოადგილე გიორგი შარაბიძემ გახსნა და საქართველოს პარლამენტის 2024 წლის 26 ოქტომბრის არჩევნებისთვის ელექტრონული ტექნოლოგიების გამოყენების შესახებ ამომრჩეველთა, მათ შორის ეთნიკური უმცირესობების ინფორმირების მიზნით, ადმინისტრაციის მიერ უკვე განხორციელებულ და მიმდინარე საქმიანობაზე ისაუბრა.

სამუშაო ჯგუფის ხელმძღვანელმა სოფიო სიჭინავამ მონაწილეებთან ერთად განიხილა ეთნიკური უმცირესობების მიმართულებით სადამკვირვებლო ორგანიზაციების, მათ შორის ეროვნულ-დემოკრატიული ინსტიტუტის (NDI) რეკომენდაციები, ასევე ისაუბრა საარჩევნო ადმინისტრაციის მიერ აღნიშნული მიმართულებით განხორციელებულ პროექტებზე და ეთნიკური უმცირესობების წარმომადგენელ ამომრჩეველთა ინფორმირებისთვის გამოყენებული მექანიზმების შესახებ.

ცესკოს საარჩევნო პროცესების მართვის დეპარტამენტის ხელმძღვანელმა ეკა ცაბაშვილმა სამუშაო ჯგუფის წევრებს მიაწოდა ინფორმაცია ეთნიკური უმცირესობებით მჭიდროდ დასახლებულ რეგიონებში ელექტრონული ტექნოლოგიების გამოყენების შესახებ დაგეგმილი ინფორმირების კამპანიის შესახებ.

შეხვედრაზე საარჩევნო სისტემების, რეფორმებისა და სწავლების ცენტრის დირექტორმა ნათია ზაალიშვილმა ისაუბრა საარჩევნო ადმინისტრაციის საგანმანათლებლო პროექტების მნიშვნელობის შესახებ, რომელიც ეთნიკური უმცირესობებით დასახლებულ რეგიონებშიც ხორციელდება. მან შეხვედრის მონაწილეებს ეთნიკური უმცირესობებით მჭიდროდ დასახლებულ რეგიონებში ჩატარებული სერტიფიცირების გამოცდის შედეგები გააცნო.

შეხვედრის მონაწილეებმა ასევე განიხილეს საარჩევნო ადმინისტრაციის მიერ დაგეგმილი იმიტირებული ელექტრონული არჩევნების გამართვასთან დაკავშირებული საკითხები.

სამუშაო ჯგუფი ცესკოში ეთნიკური უმცირესობების ამომრჩეველთა თანაბარი საარჩევნო გარემოს ხელშეწყობის მიზნით არის შექმნილი. ჯგუფის შემადგენლობაში შედიან საარჩევნო ადმინისტრაციის, საერთაშორისო და ადგილობრივი არასამთავრობო ორგანიზაციების, სახელმწიფო უწყებებისა და სახალხო  დამცველის ოფისის წარმომადგენლები (ეთნიკური უმცირესობის თემებზე მომუშავე შესაბამისი უწყებების მოწვეული წარმომადგენლები).