2024 წლის 27 მარტს საარჩევნო ადმინისტრაციის მოხელეთა სერტიფიცირების გამოცდები დასრულდა. სერტიფიცირების მიზანს საქართველოს მოქალაქის საარჩევნო კანონმდებლობის ცოდნის დადგენა წარმოადგენს, შემდგომში საარჩევნო ადმინისტრაციის მაღალკვალიფიციური მოხელეების შერჩევის ხელშეწყობის უზრუნველსაყოფად.

მოქალაქეებს 11 მუნიციპალიტეტში გახსნილი 12 საგამოცდო ცენტრი მოემსახურა. გამოცდის ჩაბარების მსურველებს საშუალება ჰქონდათ აერჩიათ ჩამოთვლილთაგან ერთ-ერთ მუნიციპალიტეტში მოქმედი საგამოცდო ცენტრი: თბილისი (2 ლოკაცია), თელავი, რუსთავი, გორი, ახალციხე, ტყიბული, ქუთაისი, ზესტაფონი, ოზურგეთი, სენაკი ან ბათუმი.

საგამოცდო ცენტრებში, ჯამურად რეგისტრირებული 970 მოქალაქიდან, 591 გამოსაცდელი გამოცხადდა. გამოცდის ჩაბარების შედეგების მიხედვით სერტიფიკატი 475-მა პირმა (80%) მიიღო (ქალი-324; კაცი-151). საგამოცდო ცენტრების მიხედვით დამუშავებული დეტალური სტატისტიკა ხელმისაწვდომია ბმულზე.

სწავლების ცენტრმა, საარჩევნო ადმინისტრაციის მოხელეთა სერტიფიცირების გამოცდაზე რეგისტრირებულ მოქალაქეებს შესთავაზა უფასო მოსამზადებელი სასწავლო კურსის გავლის შესაძლებლობა. 5 დღიანი პროგრამის ფარგლებში სწავლების ცენტრის წარმომადგენლებმა მონაწილეებთან ერთად განიხილეს საგამოცდო პროგრამით განსაზღვრული ტესტების შინაარსობრივი მხარე, იმოიხილეს შესაბამისი საკანონმდებლო აქტები და შეასრულეს პრაქტიკული დავალებები. მოსამზადებელი სასწავლო კურსი დისტანციურად (zoom პლატფორმის გამოყენებით) 15-21 მარტის პერიოდში ჩატარდა.

საარჩევნო ადმინისტრაციის მოხელეთა სერტიფიცირების გამოცდები, მიმდინარე წლის 22-27 მარტის პერიოდში, სსიპ საარჩევნო სისტემების განვითარების, რეფორმებისა და სწავლების ცენტრმა, საქართველოს ცენტრალური საარჩევნო კომისიასთან თანამშრომლობით, განახორციელა.