ცესკო და სწავლების ცენტრი საარჩევნო კულტურის განვითარების ხელშეწყობის მიზნით აგრძელებს მასშტაბური ხასიათის პროექტების განხორციელებას.

მიმდინარე ეტაპზე, სწავლების ცენტრი, საჯარო სკოლების საბაზო და საშუალო საფეხურის სამოქალაქო განათლების პედაგოგებისთვის ატარებს საინფორმაციო კურსს „დემოკრატიული არჩევნები და საარჩევნო გარემო“.

პროექტი სიახლეს წარმოადგენს, ხორციელდება საქართველოს განათლების, მეცნიერებისა და ახალგაზრდობის სამინისტროსთან პარტნიორობით და ახალგაზრდა თაობის სამოქალაქო საარჩევნო ცნობიერების ამაღლების კომპლექსური ამოცანის შესრულებას ემსახურება.

საინფორმაციო კურსის ფარგლებში სწავლების ცენტრი სამოქალაქო განათლების პედაგოგებთან შემდეგ ძირითად საკითხებს განიხილავს: ამომრჩევლის როლის მნიშვნელობა და პოლიტიკური კულტურის ასპექტები; დემოკრატიული არჩევნების ჩატარების პრინციპები და საერთაშორისო სტანდარტები; არჩევნების მოდერნიზაციის ტენდენციები და ხმის მიცემის პროცესში ელექტრონული ტექნოლოგიების გამოყენება; ამომრჩევლის საარჩევნო უფლების რეალიზება, ფარულობა და დაცულობა კენჭისყრის პროცესში; ინკლუზიური საარჩევნო გარემო; საქართველოს საარჩევნო ადმინისტრაციის მიერ ამომრჩევლებისთვის შეთავაზებული საარჩევნო სერვისები. შეხვედრებზე პედაგოგები ასევე მონაწილეობას იღებენ იმიტირებულ არჩევნებში და პრაქტიკაში ეცნობიან ელექტრონული აპარატებით კენჭისყრის პროცესის მიმდინარეობას.

სწავლების ცენტრის მიერ პედაგოგებისთვის შემუშავებული პროგრამა ითვალისწინებს  შემდგომში არჩევნების მოდულზე საგაკვეთილო პროცესის დაგეგმვის ხელშეწყობას და მოსწავლეებისთვის განახლებული ინფორმაციის გაზიარებას. ამ მიზნებისთვის მასწავლებლებს გადაეცემათ სპეციალურად მომზადებული დამატებითი რესურსი, რომელიც მოიცავს განსახილველ საარჩევნო თემატიკას, თემის განვრცობისთვის განკუთვნილ საკითხავ მასალას, პრაქტიკული სავარჯიშოებს და სარეკომენდაციო მითითებებს ჩატარების მეთოდოლოგიის შესახებ.

საინფორმაციო შეხვედრები 2024 წლის 26 თებერვლიდან დაიწყო და 7 მარტის ჩათვლით პერიოდში 22 მუნიციპალიტეტში მოქმედ საგანმანათლებლო რესურსცენტრებში გაიმართება. მასში მონაწილეობას 552 საჯარო სკოლის სამოქალაქო განათლების პედაგოგები და შესაბამისი საგანმანათლებლო რესურსცენტრის წარმომადგენლები მიიღებენ.