საარჩევნო სისტემების განვითარების, რეფორმებისა და სწავლების ცენტრმა (სწავლების ცენტრი) 2023 წლის 1 ოქტომბრის შუალედური და რიგგარეშე არჩევნებისთვის საოლქო საარჩევნო კომისიებთან საინფორმაციო შეხვედრები გამართა.

კენჭისყრის პროცესში ელექტრონული ტექნოლოგიების ინტეგრირება კომპლექსური პროცესია - მოითხოვს ამომრჩევლების ქცევის ტრანსფორმირებისთვის აუცილებელი საინფორმაციო პროგრამების განხორციელებას, ასევე სერვისის მიმწოდებელი საარჩევნო კომისიების პროფესიული უნარების განვითარებას. სწავლების ცენტრის მიერ დაგეგმილი შეხვედრები საარჩევნო ადმინისტრატორებთან, ხელს უწყობს რეფორმით შემოთავაზებული სიახლეების გაცნობას და კენჭისყრის პროცესში ელექტრონული აპარატების ეფექტიანად მართვას.  

აღნიშნული მიზნით,  მიმდინარე წლის  16 სექტემბერს სწავლების ცენტრმა ინსტრუქტაჟი ჩაატარა სამი საოლქო საარჩევნო კომისიის წევრებისთვის (5 წლის ვადით არჩეული და საარჩევნო პერიოდისთვის პარტიების მიერ დანიშნული წევრების შემადგენლობით), რომლის ფარგლებშიც მონაწილეები დეტალურად გაეცნენ პროცედურულ სიახლეებს, საარჩევნო პროცესში ამომრჩეველთა ვერიფიკაციისა და ხმის დათვლის სპეციალური ელექტრონული აპარატების ფუნქციონირების პრაქტიკულ ასპექტებს და საოლქო საარჩევნო კომისიის მანდატის ფარგლებში განსახორციელებელ სხვა საკითხებს, მათ შორის: საუბნო საარჩევნო კომისიებთან კოორდინაცია/კომუნიკაცია; საუბნო საარჩევნო კომისიის კენჭისყრის შედეგების გადამოწმება/ხელახლა დათვლა; საოლქო საარჩევნო კომისიის მიერ კენჭისყრისა და არჩევნების შედეგების შეჯამება.