საარჩევნო ადმინისტრაცია საარჩევნო კულტურის განვითარების ხელშეწყობის მიზნით აგრძელებს საინფორმაციო-სასწავლო პროგრამების განხორციელებას. ამჯერად, სსიპ საარჩევნო სისტემების განვითარების, რეფორმებისა და სწავლების ცენტრმა (სწავლების ცენტრი) და აჭარის ავტონომიური რესპუბლიკის უმაღლესმა საარჩევნო კომისიამ (უსკო), საქართველოში ევროპის საბჭოს ოფისის მხარდაჭერით, ჩაატარა საინფორმაციო შეხვედრა აჭარის ავტონომიური რესპუბლიკის საჯარო სკოლების სამოქალაქო განათლების პედაგოგებთან. ღონისძიება აჭარის ავტონომიური რესპუბლიკის განათლების, კულტურისა და სპორტის სამინისტროს  ჩართულობით განხორციელდა.

საინფორმაციო შეხვედრა მიზნად ისახავდა არჩევნების მნიშვნელობის საკითხზე მსჯელობასა და მასწავლებლებისთვის საარჩევნო რეფორმის სიახლეების გაზიარებას, შემდგომში სკოლის მოსწავლეებისთვის აღნიშნული ინფორმაციის გადაცემისა და ახალგაზრდების ინფორმირებულ ამომრჩევლებად ფორმირების პროცესის ხელშესაწყობად.

ღონისძიება საქართველოში ევროპის საბჭოს ოფისის ხელმძღვანელის მოადგილემ სტეფან სირბუმ გახსნა. მონაწილეებს მისასალმებელი სიტყვით აჭარის ავტონომიური რესპუბლიკის განათლების, კულტურისა და სპორტის მინისტრმა მაია ხაჯიშვილმა, უსკოს თავმჯდომარემ პარმენ ჯალაღონიამ და სწავლების ცენტრის დირექტორმა ნათია ზაალიშვილმა მიმართეს. გახსნის სესიაზე სპიკერებმა აღნიშნეს, რომ დემოკრატიული საზოგადოების განვითარების გზაზე აუცილებელია გაიზარდოს ახალგაზრდების ჩართულობა არჩევნებში და ამ მიმართებით სამოქალაქო განათლების პედაგოგებს აქვთ მნიშვნელოვანი როლი სკოლის ასაკიდანვე მოქალაქეთა საარჩევნო ცნობიერების ამაღლების პროცესში.

შეხვედრის ფორმატში სწავლების ცენტრის წარმომადგენლებმა პედაგოგებს დეტალურად გააცნეს შემდეგი მნიშვნელოვანი საკითხები: ადამიანის უფლებათა არსი და საარჩევნო უფლების მნიშვნელოვანი ადგილი მოქალაქეთა პოლიტიკური უფლებების სპექტრში; დემოკრატიული არჩევნების ჩატარების პრინციპები და საერთაშორისო სტანდარტები; საქართველოს საარჩევნო ადმინისტრაციის მანდატი და ამომრჩევლებისთვის შეთავაზებული სერვისები; არჩევნებში ჩართული მხარეები; საქართველოში მიმდინარე საარჩევნო რეფორმა ტექნოლოგიურ სიახლეებთან მიმართებით. ევროპის საბჭოს ექსპერტმა, არდიტა დრიზა მაიერმა, მასწავლებლებს ევროპის პრაქტიკის ჭრილში მიაწოდა ინფორმაცია არჩევნებში ციფრული ტექნოლოგიების გამოყენების საკითხებზე, ასევე ყურადღება გაამახვილა ევროპის საბჭოს სამართლებრივ და პოლიტიკის ინსტრუმენტებზე.

არჩევნებში ელექტრონული აპარატების გამოყენების პრაქტიკული ასპექტების გაცნობის მიზნით, სწავლების ცენტრმა იმიტირებული კენჭისყრის პროცესი გამართა ამომრჩეველთა ვერიფიკაციის და ხმის ელექტრონული მთვლელი აპარატების გამოყენებით, რომელშიც მონაწილეობა ღონისძიებაზე დამსწრე პედაგოგებმა მიიღეს.

საინფორმაციო შეხვედრა ევროპის საბჭოს პროექტის ფარგლებში „საარჩევნო პრაქტიკისა და პროცესის გამჭვირვალობის, ინკლუზიურობისა და სანდოობის მხარდაჭერა საქართველოში“ 2023 წლის 29-30 ივნისს, ბათუმში გაიმართა და მასში მონაწილეობა აჭარის ავტონომიური რესპუბლიკის საჯარო სკოლების სამოქალაქო განათლების 25 მასწავლებელმა მიიღო.