2023 წლის 4-9 ივნისის პერიოდში, ცესკოს სწავლების ცენტრმა პარტნიორ უნივერსიტეტებში ჩაატარა სემინარების ციკლი თემაზე „არჩევნები და ელექტრონული ტექნოლოგიები“. ღონისძიების  ფარგლებში სხვადასხვა ფაკულტეტის სტუდენტები გაეცნენ საერთაშორისო ტენდენციებს არჩევნებში ტექნოლოგიების გამოყენების მიმართულებით და განიხილეს საქართველოს გამოცდილება კენჭისყრის პროცესში ელექტრონული აპარატების გამოყენების შესახებ.

თბილისსა და რეგიონებში მოქმედ 5 უმაღლეს საგანმანათლებლო დაწესებულებაში 12 საინფორმაციო შეხვედრა გაიმართა. მასში მონაწილეობა ივანე ჯავახიშვილის სახელობის თბილისის სახელმწიფო უნივერსიტეტის, ილიას სახელმწიფო უნივერსიტეტის, აღმოსავლეთ ევროპის უნივერსიტეტის, გრიგოლ რობაქიძის სახელობის უნივერსიტეტის (თბილისისა და ბათუმის წარმომადგენლობა), იაკობ გოგებაშვილის სახელობის თელავის სახელმწიფო უნივერსიტეტის 200-მდე სტუდენტმა მიიღო.

ახალგაზრდებმა კურსი დადებითად შეაფასეს, ისინი უშუალოდ ჩაერთნენ ელექტრონული აპარატების  გამოყენებით კენჭისყრის სიმულაციაში და მოდელირებულ არჩევნებში მონაწილეობით პრაქტიკული გამოცდილება მიიღეს.

ცესკოს და სწავლების ცენტრის ეგიდით მიმდინარე აქტიური საინფორმაციო კამპანია ორიენტირებულია საარჩევნო პროცესში დანერგილი სიახლეების პოპულარიზაციაზე და ახალგაზრდების აქტიურ, ინფორმირებულ ამომრჩევლებად ჩამოყალიბების ხელშეწყობაზე.