სსიპ საარჩევნო სისტემების განვითარების, რეფორმებისა და სწავლების ცენტრი (სწავლების ცენტრი) საინფორმაციო შეხვედრებს მართავს იმ საოლქო საარჩევნო კომისიების წევრებთან, სადაც 2023 წლის 29 აპრილს შუალედური და რიგგარეშე არჩევნები გაიმართება.
საარჩევნო ადმინისტრატორებთან სამუშაო შეხვედრების ციკლის მიზანია საარჩევნო რეფორმით შემოთავაზებული სიახლეების გაცნობა და კენჭისყრის პროცესში ელექტრონული აპარატების ეფექტიანად მართვის უზრუნველყოფა.
სწავლების ცენტრის წარმომადგენლები შეხვედრებს მიმდინარე წლის 18-22 აპრილის პერიოდში ჩაატარებენ. ინსტრუქტაჟი 10 საოლქო საარჩევნო კომისიის წევრებისთვის (სრული შემადგენლობა) გაიმართება, რომლის ფარგლებშიც მონაწილეები დეტალურად გაეცნობიან პროცედურულ სიახლეებს, საარჩევნო პროცესში ამომრჩეველთა ვერიფიკაციისა და ხმის დათვლის სპეციალური ელექტრონული აპარატების ფუნქციონირების პრაქტიკულ ასპექტებს და საოლქო საარჩევნო კომისიის მანდატის ფარგლებში განსახორციელებელ სხვა საკითხებს, მათ შორის: საუბნო საარჩევნო კომისიებთან კოორდინაცია/კომუნიკაცია; საუბნო საარჩევნო კომისიის კენჭისყრის შედეგების გადამოწმება/ხელახლა დათვლა; საოლქო საარჩევნო კომისიის მიერ კენჭისყრისა და არჩევნების შედეგების შეჯამება.
